ნეტგაზეთი • RU

რატომ არ გაიაფდა თქვენი სესხი, როცა ლარი გამყარდა? – ეროვნული ბანკის პრეზიდენტის პასუხი

„გავითვალისწინეთ ის, თუ პროგნოზში რას ვხედავთ,“ – ასე ხსნის ეროვნული ბანკის პრეზიდენტი კობა გვენეტაძე იმას, რომ ლარის გამყარების მიუხედავად რეფინანსირების განაკვეთი არ მცირდება. რეფინანსირებაზე ბოლოს 23 ივნისს იმსჯელა ეროვნული ბანკის მონეტარული პოლიტიკის კომიტეტმა და განაკვეთი ისევ 9.5 პროცენტი დარჩა.

ეროვნული ბანკის პრეზიდენტის განმარტებით, რეფინანსირების განაკვეთი იმიტომ არ შეამცირეს, რომ გლობალურად მსოფლიოში და საქართველოში ინფლაციის მაჩვენებელი შესაძლოა ისევ გაიზარდოს.

„როდესაც მონეტარული პოლიტიკის კომიტეტის გადაწყვეტილება მიიღება, ამ შემთხვევაში ჩვენ, რა თქმა უნდა, ვითვალისწინებთ არსებულ სიტუაციას, მაგრამ გაცილებით უფრო მნიშვნელოვანია, გავითვალისწინოთ ის, თუ პროგნოზში რას ვხედავთ. იქედან გამომდინარე, რომ ჩვენ ვხედავთ ისევე, როგორც გლობალურად ინფლაცია უფრო და უფრო დიდი პრობლემა ხდება, რადგანაც ყველგან შეიმჩნევა მიზნობრივზე მაღალი ინფლაცია – გავითვალისწინეთ ეს და გავითვალისწინეთ ისეთი ფაქტორები, რომლებიც ახლა გვაქვს. მოგეხსენებათ, ახლა მაღალი ინფლაციაა, რაც განპირობებულია ნავთობზე, ზეთზე, შაქარზე, ხორბალზე ფასების გაზრდით მსოფლიო ბაზრებზე. ვფიქრობთ, რომ ეს იქნება დროებითი, ამ დროებითი ფაქტორების გავლის შემდეგ ინფლაცია უკვე დაუბრუნდება მიზნობრივ მაჩვენებლებს. დღესდღეობით რაც ჩანს, ალბათ უფრო გრძელვადიან პერიოდში მოგვიწევს საპროცენტო განაკვეთის შემცირება, თუმცა ყველა ამ ფაქტორს გავაანალიზებთ,“ – გვიპასუხა კობა გვენეტაძემ.

რას ელის ეროვნული ბანკი, როდის შეიძლება გადაიხედოს რეფინანსირების განაკვეთი? – „ვფიქრობთ, რომ ერთჯერადი ფაქტორების გასვლის შემდეგ, შემდეგი წლის მარტიდან უნდა დაიწყოს ინფლაციამ შემცირება. გადაწყვეტილებაც ამ ფონზე იქნება მიღებული,“ – აღნიშნა „ბათუმელებთან“ ეროვნული ბანკის პრეზიდენტმა, კობა გვენეტაძემ.

ისევ გაუფასურდება ლარი? – ესეც ვკითხეთ კობა გვენეტაძეს.

„ლარის კურსის პროგნოზზე ვერცერთი ცენტრალური ბანკი ვერ გიპასუხებთ. განსაკუთრებით იმ ქვეყანაში, სადაც მცურავი გაცვლითი კურსია. ლარის კურსის პროგნოზი არ კეთდება. რაც შეეხება მოლოდინებს ეკონომიკის ზრდასთან დაკავშირებით, არის გაუმჯობესებული, რაც ეხმარება კურსს,“ – გვითხრა ეროვნული ბანკის პრეზიდენტმა.

ნეტგაზეთის მასალების სხვა გამოცემებში გადაბეჭდვის წესი
ავტორი