Batumelebi | გასცემს არჩილ ჩიქოვანი ბათუმში მეჩეთის მშენებლობის ნებართვას? – განმარტება გასცემს არჩილ ჩიქოვანი ბათუმში მეჩეთის მშენებლობის ნებართვას? – განმარტება – Batumelebi
RU | GE  

გასცემს არჩილ ჩიქოვანი ბათუმში მეჩეთის მშენებლობის ნებართვას? – განმარტება

ბათუმის მერის მოვალეობის შემსრულებელი პირდაპირ არ პასუხობს კითხვას, გასცემს თუ არა ბათუმში მეჩეთის აშენების ნებართვას.

არჩილ ჩიქოვანმა არც ის გვითხრა, ეთანხმება თუ არა ორი სასამართლოს გადაწყვეტილებას, რომ მერია დისკრიმინაციულად მოიქცა, როცა მეჩეთის მშენებლობის ნებართვა არ გასცა და არც ის გვითხრა, თავად როგორ აფასებს ყოფილი მერის, ლაშა კომახიძის ამ გადაწყვეტილებას.

არჩილ ჩიქოვანის თქმით, მერიას სააპელაციო სასამართლოს გადაწვეტილება ჯერ არ ჩაჰბარებია. „როცა გადაწყვეტილება ჩაგვბარდება, მოვახდენთ მის ექსპერტიზას და შემდეგ მივიღებთ გადაწყვეტილებას“, – ამბობს არჩილ ჩიქოვანი.

ბათუმის მერიის დისკრიმინაცია მეჩეთის აშენების საქმეზე სააპელაციო სასამართლომ 13 აპრილს დაადგინა. მეორე ინსტანციის სასამართლომ ძალაში დატოვა ბათუმის საქალაქო სასამართლოს გადაწყვეტილება ბათუმში ახალი მეჩეთის მშენებლობის საქმეზე.

თავის მხრივ, ბათუმის საქალაქო სასამართლომ 2019 წლის 30 სექტემბერს დისკრიმინაციად მიიჩნია მუსლიმი თემის მიმართ ბათუმის მერიის დამოკიდებულება „ბათუმის ახალი მეჩეთის საქმეზე“.

მოსამართლე ჯუმბერ ბეჟანიძემ „ბათუმში ახალი მეჩეთის აშენების საქმეზე“ დისკრიმინაციის ფაქტი დაადგინა და უკანონოდ მიიჩნია მერიის მიერ გამოცემული სამართლებრივი აქტი, რომლითაც მუსლიმ თემს მეჩეთის მშენებლობაზე უარი უთხრეს. სასამართლომ არ დააკმაყოფილა სარჩელი მერიის დავალდებულების ნაწილში – მუსლიმი თემი ითხოვდა, სასამართლოს დაევალებინა მერიისთვის შესაბამისი ადმინისტრაციული აქტის გამოცემა. მოსამართლემ თქვა, რომ მშენებლობის ნებართვაზე შესაბამისი აქტების გამოცემა მერიის დისკრეციული უფლებამოსილებაა და ამაში სასამართლო ვერ ჩაერევა.

სავარაუდოდ, 13 აპრილის გადაწყვეტილებას ბათუმის მერია უზენაეს სასამართლოშიც გაასაჩივრებს.

 

ბათუმის მერიას დისკრიმინაცია მეჩეთის აშენების საქმეზე სააპელაციო სასამართლომაც დაუდგინა

ნეტგაზეთის მასალების სხვა გამოცემებში გადაბეჭდვის წესი
ავტორი