Batumelebi | ბათუმში მასწავლებლების „სინოვაკით“ ვაქცინაცია დაიწყო ბათუმში მასწავლებლების „სინოვაკით“ ვაქცინაცია დაიწყო – Batumelebi
RU | GE  

ბათუმში მასწავლებლების „სინოვაკით“ ვაქცინაცია დაიწყო

დღეს, 28 მაისს, ბათუმში სკოლის პედაგოგების  ვაქცინაცია დაიწყო. მასწავლებლებს „სინოვაკით“ აცრიან. ვაქცინაციამდე 50-მდე პედაგოგი სასტუმრო „ჰილტონში“ ჯანდაცვის სფეროს წარმომადგენლებს შეხვდა, სადაც მათ „სინოვაკთან“ დაკავშირებით მიიღეს ინფორმაცია.

„ძალიან მინდოდა აცრის გაკეთება, მასწავლებელი ვარ და 35 ბავშვი მყავს სადამრიგებლოში. როგორ შეიძლება ამდენ ბავშვთან მქონდეს სიახლოვე და არ ავიცრა. მინდოდა ეს პრობლემა მომეხსნა.

აქამდე ვერ მოვახერხე დარეგისტრირება, მანამდე თვითიზოლაციაში ვიყავი, კოვიდი არ გადამიტანია, მაგრამ ხომ შეიძლება შემხვდეს, ამიტომ მინდოდა აცრა. ერთი ჩემი კოლეგა მეუბნებოდა წამოსვლისას, „სად მიდიხარ თუ იციო“ – სკეპტიკურად შემომხედა. მე ვენდობი ექიმებს და მიხარია, რომ ავიცერი. ჭორებს ვერ ავყვები“, – ამბობს „ბათუმელებთან“ ბათუმის პირველი საჯარო სკოლის სპეცმასწავლებელი ნანი ჟღენტი.

ნანი ჟღენტი, პირველი სკოლის სპეცმასწავლებელი

„არასდროს შემიკავებია თავი. უბრალოდ, ახლა მაქვს ვაქცინაციის შანსი და გამოვიყენებ. იმიტომ ვიკეთებ ვაქცინაციას, რომ გადავარჩინო ჩემი სიცოცხლე და სხვებსაც არ შევუქმნა საფრთხე. ექიმებთან შეხვედრა დამეხმარა იმაშიც, რომ იმ კითხვებზე მივიღე დეტალური განმარტება, რაც მაინტერესებდა. მაგალითად, კითხვები მქონდა ანემიასთან, ფიზიკურ აქტივობებთან, ლაქტაციასთან დაკავშირებით. ამ ყველაფერზე ამომწურავი პასუხი მივიღე“, – ამბობს თეონა კაკაბაძე, დაწყებითის მასწავლებელი.

„გადაწყვეტილება მივიღე ძალიან იოლად, ძალიან მინდა დავიცვა ჩემი ოჯახი, ჩემი სიცოცხლე, ჩემი მოსწავლეები და კოლეგები. ვფიქრობ, ვაქცინაცია აუცილებელია და მოვალეობაცაა ჩვენი, რომ ავიცრათ“, – ამბობს მარინა ჟღენტი, ქობულეთის სოფელ ოჩხამურის საჯარო სკოლის სასწავლო ნაწილის გამგე. მის სკოლაში აქამდე არც ერთი მასწავლებელი არ იყო აცრილი და იმედოვნებს, რომ ყველა აიცრება.

ჩიქუნეთის სკოლის მასწავლებელი თამილა საფარიძე „სინოვაკით“ აიცრა.

„თავიდან არ მქონდა მოტივაცია, რადგან ბევრი ნეგატიური და განსხვავებული ინფორმაცია მესმოდა, მაგრამ შემდეგ მაინც მივიღე გადაწყვეტილება. თუ რაიმე გადაგვარჩენს ვირუსისგან, ეს აცრაა“, – ამბობს ცისანა ტაკიძე, ოჩხამურის სკოლის გეოგრაფიის მასწავლებელი.

ბათუმი. 28 მაისი, 2021 წელი. სკოლის პედაგოგები ვაქცინაციის რიგში.

ვაქცინაციის პროცესს აჭარის განათლების მინისტრი მაია ხაჯიშვილიც ესწრებოდა. მას ვკითხეთ, თუ აქვს ინფორმაცია დაახლოებით რამდენი პედაგოგია ვაქცინირებული. მინისტრი ამბობს, რომ ამ ინფორმაციას არ ფლობს.

„რადგან ვაქცინაცია ნებაყოფლობითია, აღრიცხვის ფორმას ამას არ ვაძლევთ. თუმცა გვაქვს ინფორმაცია, რომ პედაგოგები აქტიურად იცრებიან. რეგისტრირდებიან როგორც ინდივიდუალურად, ასევე ჩვენც ვეხმარებით რეგისტრაციაში“, – ამბობს ხაჯიშვილი.

მინისტრმა ასევე თქვა, რომ არ იცის ზუსტად რამდენი პედაგოგი აიცრება დღეს, თუმცა გვითხრა, რომ ჯანდაცვის სფეროს წარმომადგენლებთან შეხვედრას 50-მდე პედაგოგი ესწრებოდა.

ბათუმი. 2021 წლის 28 მაისი. პედაგოგების შეხვედრა ჯანდაცვის სფეროს წარმომადგენლებთან „ჰილტონში“, ვაქცინაციასთან დაკავშირებით.

ზუსტად რამდენი პედაგოგი აიცრება დღეს, ამის შესახებ დაზუსტებული ინფორმაცია დღის ბოლოს იქნება ცნობილი. აცრაზე პედაგოგები მოვიდნენ როგორც ბათუმის, ასევე ქობულეთისა და ხელვაჩაურის საჯარო სკოლებიდან.

_______________________

მთავარი ფოტო: ვაქცინირებული პედაგოგები: მარინა ჟღენტი, თეონა კაკაბაძე და ცისანა ტაკიძე.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com