საქართველოს მთავრობამ 2021 წლის 19 მაისს ცვლილება შეიტანა „იზოლაციისა და კარანტინის წესებში“ და ის ფარმაცევტული პროდუქტები განსაზღვრა, რომლებსაც კორონავირუსის საწინააღმდეგოდ აცრისთვის გამოიყენებს.
„იზოლაციისა და კარანტინის წესებს“ ახალი დადგენილებით შემდეგი პუნქტი დაემატა:
„საქართველოში Covid19-ის ვაქცინის დანერგვის ეროვნული გეგმის მიზნებისთვის გამოიყენება ახალი კორონავირუსით (SARS-CoV-2) გამოწვეული ინფექციის (COVID-19) საწინააღმდეგო, პროფილაქტიკური აცრისთვის განკუთვნილი ფარმაცევტული პროდუქტი, რომელსაც:
- აქვს ჯანმრთელობის მსოფლიო ორგანიზაციის ან მის მიერ აღიარებული ნებისმიერი მკაცრი მარეგულირებელი ორგანოს (SRA) მიერ მინიჭებული გამოყენების (მათ შორის, გადაუდებელი გამოყენების) ავტორიზაცია ან პრეკვალიფიკაცია;
- ან რომელზეც ჯანმრთელობის მსოფლიო ორგანიზაციაში წარდგენილია გამოყენების (მათ შორის, გადაუდებელი გამოყენების) ავტორიზაციის ან პრეკვალიფიკაციის განაცხადი, მისი დოსიე განხილვის სტადიაშია და ამასთან, უკვე მიღებული აქვს ჯანმრთელობის მსოფლიო ორგანიზაციის იმუნიზაციის ექსპერტების სტრატეგიულ მრჩეველთა ჯგუფის (SAGE) დადებითი დასკვნა;
- ასევე აქვს არანაკლებ სხვა 20 ქვეყნის ეროვნული მარეგულირებელი ორგანოს მიერ მინიჭებული გამოყენების (მათ შორის, გადაუდებელი გამოყენების) ავტორიზაცია და, ამავდროულად, აღნიშნული ვაქცინით მსოფლიო მასშტაბით აცრილია ქვეყნის სამიზნე პოპულაციაზე 10-ჯერ მეტი პირი.“.
საქართველოში 21 მაისიდან შესაძლებელი იქნება „სინოვაკის“ აცრისთვის რეგისტრაცია, აცრა კი 24 მაისიდან დაიწყება. ჩინური წარმოების „სინოვაკს“ ჯანდაცვის მსოფლიო ორგანიზაციის გადაუდებელი მოხმარების ავტორიზაცია ჯერჯერობით არ აქვს.
