შუახევისა [კლდისუბანი, კავიანი] და ქედის [დანდალო, ჯალაბაშვილები] მუნიციპალიტეტებში საფეხმავლო-საველოსიპედე ბილიკი მოეწყობა. სამშენებლო სამუშაოების შესყიდვაზე ტურისტული პროდუქტების განვითარების სააგენტომ ტენდერი 300 ათასი ლარით გამოაცხადა.
ტენდერის პირობის მიხედვით, ბილიკის მშენებლობა, რომელიც ზღვის დონიდან 350-550 მ სიმაღლეებს შორის მოეწყობა, 2021 წლის პირველ ოქტომბრამდე უნდა დასრულდეს.
პროექტი ითვალისწინებს ბილიკთან დაკავშირებული ინფრასტრუქტურის მოწყობასაც, კერძოდ, საფეხმავლო-საველოსიპედე ბილიკისთვის მოაჯირების, ველოპარკინგისა და ავტოპარკინგის მოწყობას.
„კავიანის ბილიკი იწყება სოფლის ტერიტორიაზე, გაივლის ტყით დაფარულ მონაკვეთს და მთავრდება ისევ სოფლის ტერიტორიაზე. ბილიკზე ვხვდებით ერთ-ერთ გამორჩეულ ისტორიულ ძეგლს – კავიანის ციხეს. ბილიკი გამოირჩევა თავისი რელიეფითა და სიმაღლეთა სხვაობებით, რაც დამატებით ღირებულებას სძენს ველოტურიზმით გატაცებული ვიზიტორებისათვის. შუახევის მონაკვეთი მეტ-ნაკლებად სწორ ტყის ნაწილს მიუყვება, სადაც მარტივი სირთულის ველობილიკი გვექნება, ხოლო ქედის მონაკვეთზე – კავიანის ციხიდან – დანდალოს ხიდის მიმართულებით დახრილობა დიდია, სადაც ინტეგრირებული საფეხმავლო-საველოსიპედე ბილიკი გამოირიცხა და საჭირო გახდა ალტერნატიული ველობილიკი, რომელიც იქნება სრულად იზოლირებული საფეხმავლო ბილიკისგან, სადაც გვექნება ტრამპლინები, წინაღობები და რაც მთავარია ე.წ „Down Hill“-ის ექსტრემალური დაშვების ბილიკი“ – აღნიშნულია სატენდერო დოკუმენტაციაში.
ტენდერში წინადადებების მიღება 2021 წლის 10 ივნისს დაიწყება და 15 ივნისს დასრულდება. პროექტის განხორციელებისთვის გამოყენებული მასალა უნდა იყოს მკაცრი პირობებისადმი მდგრადი და მასალის ფერები უნდა შეესაბამებოდეს ლანდშაფტს.
ამავე თემაზე:
ხიხანის ციხეზე ასასვლელი ბილიკის მოსაწყობად 865 ათასი ლარი დაიხარჯება
