Batumelebi | როგორ გამოისყიდი სახელმწიფო მიწას, რომელსაც იჯარით სარგებლობ – ახალი წესი როგორ გამოისყიდი სახელმწიფო მიწას, რომელსაც იჯარით სარგებლობ – ახალი წესი – Batumelebi
RU | GE  

როგორ გამოისყიდი სახელმწიფო მიწას, რომელსაც იჯარით სარგებლობ – ახალი წესი

მოიჯარეს, რომელსაც სახელმწიფოსგან მიწა იჯარით აქვს აღებული, შეუძლია ეს მიწა შეისყიდოს, უკვე მისი ღირებულების 75%-ის გადახდით. მიწის ფასს დამოუკიდებელი ექსპერტი ადგენს. ამ დრომდე მოიჯარეს მიწის გამოსასყიდად ღირებულების 100% უნდა გადაეხადა.

„სასოფლო-სამეურნეო დანიშნულების მიწის რესურსზე ხელმისაწვდომობის“ სახელმწიფო პროგრამის ფარგლებში, მიწის გამოსყიდვა შეუძლია იმ მოიჯარეს [ფიზიკურ თუ იურიდიულ პირს], რომელსაც იჯარის ხელშეკრულება ამ პროგრამის ამოქმედებამდე, ანუ 2020 წლის 24 ივლისამდე, არანაკლებ 6 თვით ადრე აქვს დადებული სახელმწიფო ქონების ეროვნულ სააგენტოსთან; ამასთან, განცხადების წარდგენის დროისათვის ეს ხელშეკრულება მოქმედია და რეგისტრირებულია საჯარო რეესტრში.

საქართველოს ეკონომიკის მინისტრმა 10 მაისს განაცხადა, რომ მოიჯარეებს, რომელთაც მიწის გამოსყიდვა მოუნდებათ, სახელმწიფო 25%-იან ფასდაკლებას შესთავაზებს.

2021 წლის 11 მაისიდან კი ძალაში შევიდა დადგენილება, რომლის მიხედვითაც „პროგრამით დადგენილი წესით მოიჯარისთვის უძრავი ნივთის პირდაპირი მიყიდვის ფორმით პრივატიზებისას, საპრივატიზებო თანხა განისაზღვრება დამოუკიდებელი აუდიტორის (ექსპერტის) დას­კ­ვნით დადგენილი მიწის ნაკვეთისა (მასზე არსებული ნარგავების ღირებულების ან/და მოიჯარის მიერ შექმნილი ინფრასტრუქტურის გარეშე) და იჯარის ხელშეკრულების დადებისას ამავე მიწის ნაკვეთზე არსებული შენობა-ნაგებობის საბაზრო ფასის 75%-ის ოდენობით.“

მოიჯარემ უძრავი ნივთის საპრივატიზებო თანხა უნდა გადაიხადოს ნასყიდობის ხელშეკრულების გაფორმებიდან 1 წლის განმავლობაში.

მთავარი ფოტო: „ბათუმელების“ არქივიდან
ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com