Batumelebi | გამოაცხადებენ თუ არა აუქციონს ბათუმის, გონიოსა და კვარიათის პლაჟებზე გამოაცხადებენ თუ არა აუქციონს ბათუმის, გონიოსა და კვარიათის პლაჟებზე – Batumelebi
RU | GE  

გამოაცხადებენ თუ არა აუქციონს ბათუმის, გონიოსა და კვარიათის პლაჟებზე

ბათუმის ბულვარის მიმდებარე პლაჟზე საპლაჟო ინფრასტრუქტურისთვის ნაკვეთების გასაცემად აუქციონი წელს არ გამოცხადდება. ყოფილ მოიჯარეებთან ბულვარის ადმინისტრაცია ახალ ხელშეკრულებებს პირდაპირი წესით გააფორმებს.

რაც შეეხება გონიო-კვარიათის პლაჟებს, რა ფორმით გადაეცემა ის დაინტერესებულ პირებს, ჯერ გადაწყვეტილი არ არის. ბათუმის მერიაში გვითხრეს, რომ ამ საკითხზე მსჯელობენ.

„პირდაპირი წესით იჯარის ხელშეკრულება გაფორმდება იმ მოიჯარეებთან, რომლებსაც პლაჟის კონკრეტული მონაკვეთები იჯარით 2020 წელს ჰქონდათ აღებული. ეს ერთგვარი შეღავათი იქნება მათთვის პანდემიის პირობებში. რაც შეეხება საიჯარო ქირას, ფასის ოდენობა აუდიტის შეფასების შემდეგ დადგინდება“, – უთხრეს „ბათუმელებს“ ბულვარის ადმინისტრაციაში.

ბულვარის ინფორმაციით, აუქციონი გამონაკლის შემთხვევაში შესაძლოა მხოლოდ პლაჟის იმ სექტორზე გამოცხადდეს, რომლის იჯარით აღებაზეც წელს ყოფილი მოიჯარე ფიზიკური თუ იურიდიული პირი უარს იტყვის. „დამდეგ საზაფხულო სეზონისთვის ბულვარი მაქსიმალურად ემზადება“.

რაც შეეხება კვარიათსა და გონიოს, ამ დასახლებების პლაჟები ლანდშაფტურ-სარეკრეაციო ზონაში მდებარეობს, სადაც დასაშვები ობიექტების სახეობებს ბათუმის საკრებულო განსაზღვრავს. დასაშვები ობიექტების ჩამონათვალში ბუნგალოები და სხვა კვების ობიექტები 2018 წლამდე არ იყო, თუმცა ასეთი ობიექტები გონიო-კვარიათში მაინც ფუნქციონირებდა.

ბათუმის საკრებულომ ზღვისპირა ზოლში [პლაჟთან] „ბუნგალოსა და დროებითი, მსუბუქი [გრუნტთან არამყარად დაკავშირებული] კონ­ს­ტრუქციის სხვა ობიექტების“ არსებობა 2018 წლის ივლისიდან დაუშვა.

მთავარი ფოტო: გონიო-კვარიათის პლაჟი /29.04.2021

კვარიათისა და გონიოს პლაჟები ბათუმის მერიას 41 სექტორად აქვს დაყოფილი, რომელთაგან ზოგ სექტორში დასაშვებია ბუნგალოსა თუ სხვა დროებითი ნაგებობის განთავსება, ზოგ სექტორში კი – არა.

ამ თემაზე ნახეთ სტატია „ბათუმელების“არქივიდან:

სად იქნება შესაძლებელი ბუნგალოს მოწყობა კვარიათისა და გონიოს პლაჟებზე

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com