Batumelebi | „ჩაშლას არ ვაპირებთ“ – მოიჯარეები დღეს ბულვარის გენგეგმის განხილვაზე მიდიან „ჩაშლას არ ვაპირებთ“ – მოიჯარეები დღეს ბულვარის გენგეგმის განხილვაზე მიდიან – Batumelebi
RU | GE  

„ჩაშლას არ ვაპირებთ“ – მოიჯარეები დღეს ბულვარის გენგეგმის განხილვაზე მიდიან

დღეს, 27 აპრილს, ბათუმის ჩართულობის ცენტრში დაგეგმილია ბულვარის განაშენიანებს გეგმის პრეზენტაცია არასამთავრობო ორგანიზაციებისთვის. „ბათუმელებისთვის“ ცნობილი გახდა, რომ კონკრეტული ჯგუფები ამ შეხვედრის ჩაშლას გეგმავენ. მათ შორის დასახელებულ რამდენიმე პირს დავუკავშირდით, თუმცა მათ ეს ინფორმაცია კატეგორიულად უარყვეს.

დასახელებული ჯგუფებიდან შეხვედრაში მონაწილეობის შესახებ მხოლოდ მოიჯარეებმა დაგვიდასტურეს და გვითხრეს, რომ ისინი პრეზენტაციაზე საკუთარი მოთხოვნების გასჟღერებლად მიდიან.

„ჩვენ ჩაშლას არ ვაპირებთ, ჩვენს მოთხოვნებს დავაყენებთ, დღეს იქ იქნება ყველა მოიჯარე და თქვენც მოისმენთ ჩვენს სათქმელს“, – გვითხრა ლევან ბარამიძემ, რომელიც ბულვარში მოქმედი კაფე „ლათინოს“ მფლობელია.

მოიჯარეები, რომლებიც ბათუმის მერიასთან დადებული ხელშეკრულებების საფუძველზე  ბულვარში მოქმედ კომერციულ ობიექტებს ფლობენ, მიიჩნევენ, რომ მათ ხელშეკრულებების ვადები უნდა გაუგრძელდეთ.  მათივე თქმით, აქვთ ინფორმაცია, რომ „ბულვარის მათი ობიექტებისგან გაწმენდა იგეგმება.“

ბულვარის განაშენმიანების გენგეგმა, რომელიც  კონკურსში გამარჯვებულმა კომპანიამ „ბაუ დიზაინმა“ მოამზადა, ბულვარში კომერციული ობიექტების, მათ შორის სავაჭრო ჯიხურებისა და კაფეების „გაწმენდას“ არ გეგმავს. თუმცა ითვალისწინებს ერთიანი სტანდარტისა და კონცეფციის  მიხედვით მოქმედებას.

გარდა მოიჯარეების, „ბათუმელები“ ასევე დაუკავშირდა სხვა ჯგუფებსაც, რომელთა შესახებ ასევე მოგვაწოდეს ინფორმაცია, რომ გენგეგმის ჩაშლას გეგმავენ. მათ ეს ინფორმაცია უარყვეს.

რაც „ამბასადორისთვის“ შეიძლება, რატომ არ შეიძლება ჩვენთვის? – კითხვა ბათუმის მერს

 

ნეტგაზეთის მასალების სხვა გამოცემებში გადაბეჭდვის წესი
ავტორი