Batumelebi | უკრაინის მხარდასაჭერად ბათუმში აქცია გაიმართა უკრაინის მხარდასაჭერად ბათუმში აქცია გაიმართა – Batumelebi
RU | GE  

უკრაინის მხარდასაჭერად ბათუმში აქცია გაიმართა

დღეს ბათუმში, ევროპის მოედანზე, უკრაინის მხარდასაჭერად სოლიდარობის აქცია გაიმართა. აქციის მონაწილეები თვლიან, რომ საქართველომ მკაფიოდ უნდა დააფიქსიროს მხარდაჭერა უკრაინის მიმართ და რუსეთის არგაღიზიანების პოლიტიკა უნდა დასრულდეს.

„სოლიდარობის გამოხატა მხოლოდ სიტყვებით არ არის საკმარისი, უნდა შეიქმნას საკოორდინაციო საბჭო და საჭიროების მიხედვით გადაიდგას კონკრეტული ნაბიჯები. დღეს სიჩუმე არის დანაშაული…“ –  გვითხრა ფოტოგრაფმა ედო მჟავანაძემ.

„უკრაინაში წყდება საქართველოს ბედიც, ეს უნდა გავაცნობიეროთ,“ – ამბობს გენო თებიძე, „ლელოს“ წევრი. მისი აზრით, დანაშაული იყო ის, რომ ამ დრომდე საქართველოს უკრაინაში დიპლომატიური წარმომადგენლობა არ ჰყავდა.

თემურ გორგაძე, თეოლოგი: „ხაზგასმით და მკაფიოდ უნდა დავაფიქსიროთ ჩვენი მხარდაჭერა უკრაინის მიმართ და არა ისე, რომ ვიღაცამ სადღაც რაღაც თქვა… მთავრობის ყველა წევრი უნდა იძახდეს, რომ მხარს უჭერს და ეს უნდა ჩანდეს საქმითაც, ჩვენ ამას უნდა ვამბობდეთ მუდმივად საერთაშორისო ფორმატებშიც, რომ რუსეთი ოკუპანტია… ჩვენ უნდა შევეშვათ რუსეთის არგაღიზიანების პოლიტიკას, რადგან ამ პოლიტიკიდან ზიანის მეტი არაფერი მიგვიღია.“

ბოლო დღეების განმავლობაში აღმოსავლეთ უკრაინაში, კონფლიქტის ზონაში, არაერთხელ დაირღვა მხარეებს შორის დადებული ცეცხლის შეწყვეტის შეთანხმება, რასაც ემსხვერპლა არაერთი უკრაინელი სამხედროსა და დონეცკისა და ლუგანსკის დე ფაქტო რესპუბლიკების მებრძოლების სიცოცხლე.

ნეტგაზეთის მასალების სხვა გამოცემებში გადაბეჭდვის წესი
ავტორი