შემსუბუქებული რეგულაციების შესაბამისად, თეატრებს სპექტაკლების წარმოდგენა და მაყურებლების მიღება აპრილის შუა რიცხვებიდან შეეძლებათ. ბათუმის თოჯინების თეატრს ბავშვებისთვის სპექტაკლი, სხვა თეატრების მსგავსად, თითქმის 1 წელია არ წარმოუდგენია. თუმცა ტარდებოდა რეპეტიციები რეგულაციების დაცვით.
თოჯინების თეატრი ბათუმში აპრილის შუა რიცხვების შემდეგ განაახლებს სპექტაკლების ჩვენებას და ორ პრემიერას წარმოადგენს: გელა გელაძის დადგმულ სპექტაკლს ,,ყველა თაგუნას უყვარს ყველი“ და გიორგი ჩხაიძის ,,პატარა პრინცს“, რომელიც ანტუან დე სენტ ეგზიუპერის ,,პატარა პრინცის“ მიხედვითაა დადგმული.
გარდა პრემიერებისა ბათუმის თოჯინების თეატრში აპრილის შუა რიცხვების შემდეგ წარმოდგენილი იქნება თეატრის მრავალფეროვანი რეპერტუარი, კერძოდ, სპექტაკლები: ,,მიაგული”, ,,სამი გოჭი”, ,,მოჯადოებული ფერია”, ,,ფერადი ნისლების სანაპირო”, ,,ბატის ჭუკი”, ,,დედობილი”, ,,ოცნების გზაჯვარედინი”, ,,ბიჭუნა და კარლსონი”, ,,კოკროჭინა”, ,,წითელქუდა”, ,,კონკია”, ,,წერილი ჯერალდინას”, ,,თოვლია”, ,,რომეო და ჯულიეტა”, ,,მიყვარხარ!მიყვარხარ!მიყვარხარ!”, ,,ფიფქია და შვიდი ჯუჯა”, ,,მერი პოპინსი”, ,,ნამცეცა”, ,,ვეშა-პიკო”, ,,პატარა დინოზავრის პლანეტა”, ,, გერდა” და ,,გარეული გედები”.
თოჯინების თეატრში 186 მაყურებელი ეტევა, თუმცა კოვიდპანდემიის პრევენციის მიზნით დარბაზში დისტანცია იქნება დაცული სავარძლებს შორის, რაც მაყურებელთა რაოდენობას ყოველ სპექტაკლზე 65-მდე შეამცირებს.
ამჯერად თოჯინების თეატრში პანდუსს ამონტაჟებენ და მოეწყობა შშმ პირებისთვის ადაპტირებული საპირფარეშო.
