9 პედაგოგს და 5 მოსწავლეს ქობულეთის მესამე სკოლაში კოვიდი დაუდასტურდა

ქობულეთის მესამე საჯარო სკოლაში 9 პედაგოგს და 5 მოსწავლეს კოვიდი დაუდასტურდა. ინფორმაციას სკოლის დირექტორი ნანა მენაბდე „ბათუმელებთან“ ადასტურებს.

ამჟამად სკოლაში სასწავლო პროცესი შეწყვეტილია. როგორც დირექტორი ამბობს, ელოდება რეკომენდაციებს თუ უნდა გააგრძელონ მუშაობა.

„12 დღით არის სკოლა ონლაინსწავლებაზე გადასული ჯერჯერობით. პირველი შემთხვევა 19 თებერვალს გამოვლინდა და დაწყებითი საფეხურის ერთ მოსწავლეს დაუდასტურდა კოვიდი, რომელსაც სავარაუდოდ მშობლისგან გადაედო. ამ ბავშვის კლასში 27 მოსწავლე გადავიყვანეთ ონლაინზე, თუმცა 20 თებერვალს კიდევ დაუდასტურდა მერვე ბ კლასის ერთ მოსწავლეს კოვიდი და ის კლასიც ონლაინზე გვყავდა გადაყვანილი.“

როგორც სკოლის დირექტორი ამბობს, გუშინ, 23 თებერვალს, სკოლაში იმყოფებოდნენ  აჭარის საზოგადოებრივი ჯანდაცვის ცენტრის წარმომადგენლები, რომლებმაც გეგმიური PCR-ტესტი ჩაუტარეს პედაგოგებს და დღეს, 24 თებერვალს, უკვე 8 პედაგოგს დაუდასტურდა კორონავირუსი.

„მანამდე ერთ პედაგოგს უკვე დადასტურებული ჰქონდა კოვიდი და ახლა მთლიანობაში სკოლაში 9 პედაგოგს და 5 მოსწავლეს აქვს დადასტურებული კოვიდი. ორი მასწავლებელი ემოციურ ფონზე გადაიყვანეს საავადმყოფოში. ხვალ დავჯდებით ალბათ დირექცია და გადავწყვეტთ, ონლაინზე გადასვლის საკითხს,“- ამბობს სკოლის დირექტორი.

როგორც აჭარის საზოგადოებრივი ჯანდაცვის ცენტრში „ბათუმელებს“ უთხრეს, რისკების შეფასების საფუძველზე სკოლა ონლაინრეჟიმზე გადავიდა, – „სკოლაში ეპიდემიოლოგიური კვლევები ისევ გაგრძელდება.“