Batumelebi | აჭარის მთავრობა: საპროტესტო აქციას არ აქვს ხალხის ნდობა აჭარის მთავრობა: საპროტესტო აქციას არ აქვს ხალხის ნდობა – Batumelebi
RU | GE  

აჭარის მთავრობა: საპროტესტო აქციას არ აქვს ხალხის ნდობა

„2 თვეზე მეტია აჭარის მთავრობის სახლთან იმართება აქცია, რომელსაც არ აქვს ხალხის ნდობა და საზოგადოების მხარდაჭერა. შესაბამისად, აქციის მონაწილეები სხვადასხვა ხერხით, პერიოდულად მიმართავენ დესტრუქციულ ქმედებებს…“ – აღნიშნულია აჭარის მთავრობის მიერ გავრცელებულ ინფორმაციაში.

დღეს, 4 თებერვალს, საპროტესტო აქციის მონაწილეები აჭარის მთავრობის სახლის უკანა მხარეს გადავიდნენ. ისინი ამბობენ, რომ თორნიკე რიჟვაძეს დისკომფორტს შეუქმნიან და გადაადგილებას შეუზღუდავენ.

აჭარის მთავრობის პრესცენტრმა ინფორმაცია დღეს, მას შემდეგ გაავრცელა, როცა აჭარის მთავრობის თავმჯდომარე თორნიკე რიჟვაძე „ნაციონალური მოძრაობის“ ერთ-ერთ ლიდერს, ელგუჯა ბაგრატიონს შეხვდა.

„ოპოზიციის მოთხოვნით შედგა შეხვედრა აჭარის მთავრობის თავმჯდომარესა და ნაციონალური მოძრობის წარმომადგენელს შორის. როგორც მოსალოდნელი იყო, „ნაციონალური მოძრაობის“ წარმომადგენელი შეეცადა ჩვეული ხელწერით, საქმიანი და კონსტრუქციული საუბარი დესტრუქციაში გადაეყვანა. აჭარის მთავრობა აგრძელებს ხალხის მიერ გამოცხადებული ნდობით და მანდატით აღასრულოს დაკისრებული უფლებამოსილება და არ დაუშვას პროვოკაცია,“ – აღნიშნულია აჭარის მთავრობის პრესცენტრის მიერ გავრცელებულ ინფორმაციაში.

დღეს, დღის მეორე ნახევარში, საპროტესტო აქციის მონაწილეები ისევ მთავრობის სახლის შესასვლელთან გადმოვიდნენ, სადაც კარვები 2 ნოემბრიდან არის გაშლილი და საპროტესტო აქცია გრძელდება. საპროტესტო აქციის მონაწილეები არჩევნების ხელახლა ჩატარებას ითხოვენ.  ამჯერად ამ მოთხოვნას თორნიკე რიჟვაძის თანამდებობიდან გადადგომა დაემატა.

ნეტგაზეთის მასალების სხვა გამოცემებში გადაბეჭდვის წესი
ავტორი