გარემოს ეროვნული სააგენტო ბათუმში ადმინისტრაციულ შენობას „მელკი მორიას“ ნაცვლად ადლიის ქუჩაზე ააშენებს. მიწის ნაკვეთი, სადაც შენობა უნდა აშენდეს, აჭარის საკუთრებაა და ის სააგენტოს სარგებლობის უფლებით გადაეცა. სააგენტოს ახალი შენობის აშენებაზე ტენდერი აქვს გამოცხადებული. სატენდერო თანხა 1 619 060 ლარია.
ადრე სააგენტოს ახალი შენობის აშენება „მელკი მორიაზე“ [ბათუმის თევზის ბაზრის მიმდებარედ], ზღვის პირას იგეგმებოდა, თუმცა სააგენტომ აქ მშენებლობა იმ მიზეზის გამო ვერ დაიწყო, რომ ეს ტერიტორია აჭარის მთავრობას ინვესტორისთვის გადასაცემად სჭირდება. შესაბამისად, სამინისტრომ სააგენტოს ტერიტორია ადლიაში გადაუცვალა.
ბათუმი / ტერიტორია ადლიაში, სადაც გარემოს ეროვნული სააგენტოს ადმინისტრაციული შენობა უნდა ააშენონ / ფოტო ტენდერიდან
ახალი შენობა ბათუმში, ადლიის ქუჩა N102ა-ში მდებარე მიწის ნაკვეთზე აშენდება. ნაკვეთის ფართობი 2 703 კვ/მ-ია.
არქიტექტურული პროექტის შეთანხმებაზე ბრძანებას ბათუმის მერის მოვალეობის შემსრულებელმა, არჩილ ჩიქოვანმა, ხელი 2021 წლის 29 იანვარს მოაწერა.
გარემოს ეროვნული სააგენტოს ადმინისტრაციული შენობა ბათუმში / პროექტი / ფოტო ტენდერიდან
სააგენტოს ტენდერის მიხედვით, წინადადებების მიღება 2021 წლის 23 თებერვალს დასრულდება. ტენდერში გამარჯვებულმა შენობა სამუშაოების დაწყების შესახებ სააგენტოს წერილობითი მოთხოვნიდან 10 თვეში უნდა ააშენოს.
ამავე თემაზე:
ბათუმში თევზის ბაზართან გარემოს ეროვნული სააგენტო ახალ შენობას ააშენებს
