პანდემიის დროს „ბათუმიველოს“ სერვისი გაუმჯობესების ნაცვლად, გაქრა – ტერმინალებში ველოსიპედი საერთოდ აღარ დაგხვდებათ. ბულვარში სასეირნოდ გასულ ადამიანებს მუნიციპალური ველოსიპედებით სარგებლობის შესაძლებლობა უკვე მეორე წელია აღარ აქვთ. „ბათუმიველოდან“ ბათუმის ბულვარში ველოსიპედების გასაჩერებელი მოწყობილობაღა შემორჩა.
„ბათუმიველოს“ სისტემის განახლება ბათუმის მერიამ 2020 წლის ზაფხულში გადაწყვიტა, რაც თავად მოძველებული ველოსიპედების რეაბილიტაციას და საბარათე სისტემის შემოღებას ითვალისწინებდა. „სისტემის განახლება“ ამჯერად საბარათე სისტემიდან მობილური აპლიკაციებით სარგებლობაზე გადასვლას გულისხმობდა.
2020 წლის 29 ივნისს „ბათუმის ავტოტრანსპორტის“ ადმინისტრაციის უფროსმა, მარად სანიკიძემ „ბათუმელებს“ უთხრა, რომ 2020 წლის ივლისის ბოლოსთვის გარემონტებულ ველოსიპედებს დააბრუნებდნენ ქსელში.
დღეს, 2021 წლის პირველ თებერვალს, „ბათუმის ავტოტრანსპორტის“ პრესცენტრში გვითხრეს, რომ ვერც ერთი ხელმძღვანელი პირი ვერ გააკეთებს კომენტარს ამ თემაზე და ვერც კონკრეტულ ინფორმაციას მოგვაწვდიან, რატომ ვერ შესრულდა ეს დაპირება.
„უახლოეს დღეებში გვექნება „ბათუმიუველოს“ შესახებ ინფორმაცია და შეგატყობინებთ,“ – აღნიშნეს „ბათუმის ავტოტრანსპორტის“ პრესცენტრში.
„ბათუმის ავტოტრანსპორტი“ ბათუმის მერიის ქვემდებარე ორგანიზაციაა.
მთავარი ფოტო: „ბათუმიველოს“ საპარკინგზე ადგილი, ბათუმის ბულვარი, 2021.
