დღეს, პირველ თებერვალს, აჭარის საჯარო სკოლებში სასწავლო პროცესი სკოლის შენობებში განახლდა. გამონაკლისი მხოლოდ შუახევის მუნიციპალიტეტის სოფელ ცინარეთის საჯარო სკოლაა, სადაც სასწავლო პროცესის განახლება ორი კვირით გადაიდო, რადგან 3 პედაგოგს კოვიდი დაუდასტურდა.
აჭარის განათლების სამინისტროს ინფორმაციით, საჯარო სკოლებში მოსწავლეთა გამოცხადების მაჩვენებელი აჭარაში ასე გადანაწილდა:
- ბათუმი -73.5%;
- ხელვაჩაური-81%;
- ქობულეთი-85 %;
- შუახევი-93%;
- ქედა-91%;
- ხულო- 95%.
სამინისტროს განცხადებით, ეს არის 12:00 საათზე მოსწავლეთა გამოცხადების სტატისტიკა (I ცვლა).
სასწავლო პროცესის დაწყებამდე კორონავირუსზე ტესტი ჩაუტარდა სკოლის პედაგოგებსა და ადმინისტრაციულ პერსონალს. ტესტირება ორი კვირის შემდეგ განმეორებით ჩატარდება.
საქართველოს განათლების სამინისტროს განცხადებით, პანდემიიდან გამომდინარე სკოლებს შერეული მოდელის გამოყენების უფლებაც აქვთ და იმ მოსწავლეებს, რომლებიც საკლასო სივრცეში სწავლის გაგრძელებაზე უარს იტყვიან, დისტაციურად შეუძლიათ სწავლის გაგრძელება.
