დღეს, 29 იანვარს, ბათუმის საკრებულოს სხდომაზე საკრებულოს წევრი ნატალია ზოიძე ბათუმის საკრებულოს თავმჯდომარის, სულიკო თებიძის მოადგილედ აირჩიეს.
საკრებულოს თავმჯდომარის მოადგილე აქამდე ლაშა სირაბიძე იყო, რომელიც 2020 წლის არჩევნების შედეგად აჭარის უმაღლესი საბჭოს წევრი გახდა „ქართული ოცნების“ პროპორციული სიით.
ნატალია ზოიძის ამ თანამდებობაზე არჩევას საკრებულოს 17-მა წევრმა მისცა ხმა.
საკრებულოს სხდომა
ნატალია ზოიძე აქამდე ბათუმის საკრებულოს ფრაქცია „ქართული ოცნება – დემოკრატიული საქართველოს” თავმჯდომარე იყო. ჯერჯერობით ფრაქციის თავმჯდომარის პოზიცია ვაკანტურია.
დღეს, ასევე, საკრებულოს სხდომაზე აირჩიეს იურიდიული კომისიის თავმჯდომარე. ამ პოსტს საკრებულოს წევრი „ქართული ოცნებიდან“ დავით მახარაძე დაიკავეს. ეს პოსტი ვაკანტური იყო მას შემდეგ, რაც თანამდებობა დაატოვებინეს თემურ კახიძეს, მას შემდეგ, რაც ის „ევროპულ საქართველოში“ გადავიდა.
დავით მახარაძე, საკრებულოს წევრი. ფოტო: „ბათუმელები“/ცაგო კახაბერიძე
დღეს, 29 იანვარს, ბათუმის საკრებულოს სხდომაზე დასწრების შესაძლებლობა არ მისცეს მოქალაქეებს. მათ უთხრეს, რომ დღეს სხდომაზე დასასწრებად სპეციალური საშვი გუშინ უნდა აეღოთ, თუმცა საკრებულოს რეგლამენტი საშვის აღებას სხდომის დაწყებამდე 1 საათით ადრე ითვალისწინებს. შესაბამისად, დღეს ამ გადაწყვეტილებით საკრებულომ რეგლამენტი დაარღვია.
