დიდი ბრიტანეთის უმაღლესმა სასამართლომ წარმოებაში არ მიიღო აზერბაიჯანის საერთაშორისო ბანკის ყოფილი ხელმძღვანელის ცოლის, ზამირა გაჯიევას განცხადება საქმის გადახედვაზე – წერს „ბიბისი“.
გაჯიევა ცდილობდა გაესაჩივრებინა ლონდონის სასამართლოს 2018 წელს მიღებული გადაწყვეტილება მისი ქონების კონფისკაციაზე დაუდგენელი სიმდიდრის კანონის ფარგლებში.
კანონი დიდ ბრიტანეთში მიღებულ იქნა 2018 წლის თებერვალში და გაჯიევა პირველი უცხოელი აღმოჩნდა, რომელსაც ეს კანონი შეეხო.
ზამირა გაჯიევას ქმარი, აზერბაიჯანის საერთაშორისო ბანკის ყოფილი ხელმძღვანელი ჯაჰანგარ გაჯიევი 2016 წელს ბაქოს სასამართლომ გაასამართლა თაღლითობის, გაფლანგვისა და თანხის მითვისების ბრალდებით.
ზამირა გაჯიევამ დიდ ბრიტანეთში მდიდრული ცხოვრებით მიიქცია ყურადღება. მან ლონდონში 20 მილიონ ფუნტ სტერლინგად ღირებული უძრავი ქონება შეიძინა, 16 მილიონი ფუნტი სტერლინგი კი ათი წლის განმავლობაში უნივერმაღ Harrods-ში დახარჯა.
დიდი ბრიტანეთის დანაშაულთან ბრძოლის ეროვნულმა სააგენტომ [NCA] მას მოსთხოვა, აეხსნა საიდან ჰქონდა 22 მლნ ფუნტი, რომლითაც გაჯიევამ ლონდონის ყველაზე პრესტიჟულ რაიონებში უძრავი ქონება შეიძინა და, ასევე იყიდა გოლფის კლუბი ბერკშირის საგრაფოში.
უმაღლესი სასამართლოს გადაწყვეტილების შემდეგ გაჯიევას ქონებას დიდ ბრიტანეთში კონფისკაცია ემუქრება, თუ კი გაჯიევა ვერ დაადასტურებს ქონების კანონიერ წყაროს.
„დაუდგენელი სიმდიდრის“ მფლობელებს თავისუფლების აღკვეთა არ ემუქრებათ, რადგან საქმე განიხილება არა სისხლის სამართლის, არამედ სამოქალაქო კოდექსის ფარგლებში.
______________
ფოტოზე: ზამირა გაჯიევა. ფოტო: ვიკიპედია
