ლონდონში დასრულდა აზერბაიჯანის საერთაშორისო ბანკის ყოფილი ხელმძღვანელის ცოლის, ზამირა გაჯიევას საქმის განხილვა, – წერს BBC. ეს საქმე განსაკუთრებით იმითაა მნიშვნელოვანი, რომ შესაძლოა ამას მოჰყვეს დიდ ბრიტანეთში მცხოვრები იმ პირების ქონების წარმომავლობის შესწავლა, რომელთა სიმდიდრის წყაროც დაუდგენელია.
ზამირა გაჯიევას ქმარი, აზერბაიჯანის საერთაშორისო ბანკის ყოფილი ხელმძღვანელი ჯაჰანგარ გაჯიევი 2016 წელს ბაქოს სასამართლომ გაასამართლა თაღლითობის, გაფლანგვისა და თანხის მითვისების ბრალდებით. ზამირა გაჯიევა ბოლო წლებია დიდ ბრიტანეთში ცხოვრობს. იგი 2018 წელს გახდა დიდი ბრიტანეთის ახალი ანტიკორუფციული კანონის პირველი სამიზნე, რომელიც დაუდგენელი წარმოშობის სიმდიდრეს ეხება. გაჯიევამ ორჯერ გაასაჩივრა ორდერი, თუმცა 5 თებერვალს მისი სააპელაციო სარჩელი სასამართლომ არ მიიღო და გაჯიევა გასაჩივრებას უზენაეს სასამართლოში ვეღარ შეძლებს.
გაჯიევამ დიდ ბრიტანეთში ძალიან მდიდრული ცხოვრებით მიიქცია ყურადღება. მან ლონდონში 20 მილიონ ფუნტ სტერლინგად ღირებული უძრავი ქონება შეიძინა – , 16 მილიონი ფუნტი სტერლინგი კი უნივერმაღ Harrods-ში დახარჯა.
დიდ ბრიტანეთში მოსახლეობა უკმაყოფილოა, რომ ლონდონი საეჭვო კაპიტალის თავშესაფრად იქცა – წერს BBC. რამდენიმე წლის წინ ქვეყანაში შეიმუშავეს ახალი ინსტრუმენტი, „დაუდგენელი სიმდიდრის ორდერი“, რაც სამართალდამცავებს უფლებას აძლევს სიმდიდრის წარმომავლობის დასაბუთება მოითხოვონ.
ახლა გაჯიევამ 7 დღის ვადაში უნდა დაასაბუთოს სიმდიდრის კანონერი წარმომავლობა, წინააღმდეგ შემთხვევაში დიდი ბრიტანეთის დანაშაულთან ბრძოლის ეროვნულ სააგენტო მიმართავს სასამართლოს მისი ქონების კონფისკაციის მოთხოვნით, ქონება გაიყიდება და მიღებული თანხა დიდი ბრიტანეთის ხაზინაში შევა.
თუ კი გაჯიევა წარმოადგენს შემოსავლის კანონიერ წყაროებს, დიდი ბრიტანეთის დანაშაულთან ბრძოლის ეროვნულ სააგენტოს [NCA] 60 დღე აქვს მისი ანგარიშების შესასწავლად და ამის შედეგ გადაწყდება, დაიხურება საქმე თუ NCA დაიწყებს გაჯიევას ქონების კონფისკაციის საქმეს.
BBC წერს, რომ როგორადაც არ უნდა განვითარდეს მოვლენები, „დაუდგენელი სიმდიდრის“ მფლობელებს არაფერი ემუქრებათ, ქონების ჩამორთმევა მათ დამნაშავეებად არ აქცევს, რადგან საქმე განიხილება არა სისხლის სამართლის, არამედ სამოქალაქო კოდექსის ფარგლებში.
„დაუდგენელ სიმდიდრეზე“ ორდერი შეიძლება გამოწეროს სასამართლომ მხოლოდ პოლიტიკურ ფიგურებზე ევროპის გარეთ და მძიმე დანაშაულში ეჭვიმიტანილებზე, მოქალაქეობის მიუხედავად.
გაჯიევას ორდერი, რომელიც 2018 წლის თებერვალში გამოიწერა, პირველია. სასამართლოში კიდევ სამი მსგავსი საქმე უნდა შევიდეს. ვისზე გამოიწერება ორდერები უცნობია, თუმცა BBC-ს ცნობით, NCA-მ განაცხადა, რომ გამოიწერება ორდერები პირებზე აფრიკიდან, აზიიდან, ყოფილი საბჭოთა კავშირის ქვეყნებიდან, მათ შორის რუსეთიდან.
BBC წერს, რომ NCA სასამართლოს გადაწყვეტილებით კმაყოფილია. „ეს ახალი კანონია და ჩვენ გვესმოდა, რომ საქმე სასამართლომდე მივიდოდა. გადაწყვეტილებით კმაყოფილები ვართ, შეიქმნა პრეცედენტი, რომელიც დაგვეხმარება შემდეგ შემთხვევებში“, – განაცხადა NCA -ს ერთ-ერთმა ხელმძღვანელმა.
___________
მომზადებულია BBC-ზე დაყრდნობით.
