ნეტგაზეთი • RU

ხმაური და დაპირისპირება ბათუმის ძველი ბულვარის გარშემო [ვიდეო]

23 დეკემბერს ბათუმის შოთა რუსთაველის უნივერსიტეტში ძველი ბულვარის განვითარების კონცეფციის განხილვა ხმაურისა და დაპირისპირებების ფონზე შედგა. დარბაზი ხალხით იყო სავსე, პრეზენტაციას მთავრობის წევრები, ბულვარში მდებარე კაფეების მეპატრონეები, არასამთავრობო ორგანზიაციების წარმომადგენლები და თემით დაინტერესებული ადამიანები ესწრებოდნენ.

რატომ გახდა აუცილებელი კულტურული მემკვიდრეობის ძეგლის, ძველი ბულვარის რეკონსტრუქცია, მაშინ როცა ქალაქში არა ერთი ქუჩა თუ სკვერი ცუდ მდგომარეობაშია? ხომ არ დარჩებიან ბულვარს მიღმა ის მეწარმეები, რომელთაც კაფე-ბარები აქვთ ბულვარში? უნდა ვენდოთ თუ რა მთავრობას, როდესაც ის წარადგენს კონცეფციას, რომლის თანახმადაც ბულვარს ხეები ემატება და ახალი შენობები ჯერ-ჯერობით არ სჩანს? – ეს იყო ძირითადი კითხვები, რომელიც პრეზენტაციაზე ისმოდა ხან შეკითხვის, ხან კი შენიშვნის სახით.

კონცეფციის განხილვა

კონცეფციის განხილვა

პრეზენტაციის დასაწყისშივე კოკა გეგუჩაძეს, შპს „ოაზისის“ ხელმძღვანელს, რომლის კომპანიაც კონცეფციის ავტორია, პრეზენტაცია მრავალჯერ შეაწყვეტინეს რეპლიკებითა და მწვავე კრიტიკით, რომლის ადრესატიც ხშირ შემთხვევაში აჭარის მთავრობა და აჭარის ფინანსთა და ეკონომიკის სამინსტრო იყო.

„რაღა ბულვარს მიადექით, ჭაობს მიხედეთ, მოწესრიგება არ სჭირდება?!“; „აქ არის მთავრობის ფინანსური ინტერესები“; „არ მოგვწონს ეს კონცეფცია“ – მსგავსი რეპლიკები ხშირად ისმოდა დარბაზში და ჩოჩქოლში იზრდებოდა, რის გამოც აჭარის კულტურული მემკვიდრეობის სააგენტოს უფროსს, მირანდა ჩარკვიანს, რომელიც პრეზენტაციას უძღვებოდა, ბევრჯერ მოუხდა თავისი ადგილის დატოვება და რეპლიკის ავტორების დაშოშმინება, რომ კოკა გეგუჩაძისთვის პრეზენტაციის ჩატარების საშუალება მიეცა.

ადგილი ჰქონდა ფიზიკურ დაპირისპირებასაც ჯემალ ქიქავასა და უმაღლესი საბჭოს დეპუტატს, დავით ბაციკაძეს შორის, რის გამოც პრეზენტაცია მცირე დროით შეწყდა.

შეხვედრაზე გაისმა საყვედური აჭარის უმაღლეს საბჭოში ბათუმის მაჟორიტარი დეპუტატის, კაკო ძნელაძის მისამართითაც, რომელიც წინა ხელისუფლების დროს ძველი ბულვარის შესასვლელში ე.წ. ტექნოლოგიური უნივერსიტეტის აგების წინააღმდეგი იყო და ყოფილ მთავრობას მწვავედ აკრიტიკებდა კულტურული მემკვდრეობის ხელყოფის გამო.

„თქვენ ყველანი ამაში ჩაერთვებით… ერთი ხე არ უნდა მოიჭრას და ერთი შენობა არ უნდა დაინგრეს, მხოლოდ ამაზეა საუბარი, მოდით, მოვუსმინოთ. აგერ ხართ თქვენ და აგერ ვარ მე, ერთი დეპუტატი. ჩვენ გვინდა, რომ ბულვარში იყოს უფრო მეტი ხე, უფრო მეტი სიმწვანე და არ უნდა იყოს ამდენი „ხოფის ბაზარი“ – განაცხადა კაკო ძნელაძემ.

ხმაურიანი იყო იმ მეწარმეების შენიშვნებიც, რომლებიც სხვადასხვა ობიექტებს ფლობენ ბულვარის ტერიტორიაზე. მირანდა ჩარკვიანმა მათ არაერთხელ მოუწოდა, მოესმინათ პრეზენტაციისთვის და შემდეგ დაესვათ შეკითხვები, თუმცა დისკუსია გამწვავდა და საბოლოოდ ბიზნესმენებმა პრეზენტაცია პროტესტის ნიშნად დატოვეს.

შეხვედრა ორ საათზე მეტ ხანს გაგრძელდა. მსმენელების უმრავლესობა ძველ ბულვარში წარმოდგენილი კონფეცფიის განხორციელების წინააღმდეგი იყო.

„ეს არის მშვენიერი კონცეფცია, თუ განხორციელდება სხვა ადგილას, ახალ ბულვარში ან გონიოში და არა ძველ ბულვარში. ამ კონცეფციის განხორციელების შემთხვევაში შუა ბულვარში გაჩენილი კაფეები ძველ ბულვარს დაუკარგავს სიმყუდროვეს, ეს აღარ იქნება ადგილი, სადაც შეიძლება სკამზე ჩამოჯდე, დაისვენო. ამ კაფეებიდან გამოსული მუსიკის ხმაურს როგორ დაარეგულირებთ? კაფედან გამოსულ ადამიანს გაუჩნდება ამ ადგილიდან წასვლის და არა სეირნობის, დასვენების სურვილი“ – აღნიშნა ბლოგერმა და ჟურნალისტმა დათო ტრაპაიძემ.

პრეზენტაციაზე დაისვა შეკითხვა „ფეისბუქზე“ არაოფიციალურად გავრცელებული ვიდეოკონცეცფიის შესახებაც, სადაც ჩანს რომ ძველ ბულვარს ემატება შენობები. „ადასტურებთ თუ უარყოფთ რომ ეს კონცეფციაც თქვენი მომზადებულია?“- ჰკითხა ლევან ხუჯაძემ კოკა გეგუჩაძეს, რაზეც მან ერთმნიშვნელოვანი პასუხი არ გასცა: „კონცეფცია შეიძლება არსებობდეს მილიონი“ – განაცხადა კოკა გეგუჩაძემ.

აჭარის მთავრობა რომ ძველი ბულვარის რეკონსტრუქციას აპირებს, ამის შესახებ ერთი კვირის წინ გახდა ცნობილი. ამის აუცილებლობას მთავრობა, კერძოდ ფინანსთა და ეკონომიკის სამინისტრო და აჭარის კულტურული მემკვიდრეობის სააგენტო იმით ხსნიან, რომ ბულვარი განახლებას საჭიროებს და ახალი კონცეფციით ძველ ბულვარს მეტი გამწვანება დაემატება, ძველი კაფე-ბარები აღებული იქნება და მათ ახალი კაფეები ჩაანაცვლებს, რომლებიც ბულვარში, სავალი ბილიკის გაუქმებით გამოთავისუფლებულ, გამწვანებულ ადგილებში განთავსდება.

ძველი ბულვარის რეკოსტრუქციის იდეას ჯერ-ჯერობით მხოლოდ მთავრობის წევრები უჭერენ მხარს. არასამთავრობო ორგანიზაციების უმრავლესობის, კულტურული მემკვიდრეობის დამცველებისა და ბულვარში მდებარე კაფე-ბარების მფლობელების, მცირე მეწარმეების ინტერესები ძირითადად ერთმანეთს ემთხვევა. ძველი ბულვარი უნდა მოწესრიგდეს, მაგრამ იერ-სახე არ უნდა შეიცვალოს, წინააღმდეგ შემთხვევაში კულტურული მემკვიდრეობის ძეგლი აღარ იქნება – ასეთია მათი პოზიცია.

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com