შუახევში, სოფელ ფურტიოში მცხოვრებმა 92 წლის აკაკი მჟავანაძემ კორონავირუსი დაამარცხა. მას ერთი ფილტვი აქვს, თუმცა ახალ ვირუსთან გამკლავება მაინც შეძლო.
აკაკი მჟავანაძე კლინიკაში პნევმონიისა და ესენციური ჰიპერტენზიის დიაგნოზით შემოიყვანეს და ერთი კვირის განმავლობაში მკურნალობდა ბათუმში. კლინიკა „ბაუდან“ კი გუშინ, 11 დეკემბერს გაწერეს.
როგორც აკაკი მჟავანაძის შვილი, ბიჭიკო მჟავანაძე „ბათუმელებთან“ ამბობს, 92 წლის მამას ერთი ფილტვი ახალგაზრდობაში, ჯარში ყოფნის პერიოდში დაუზიანდა, თუმცა ის მხნედ გრძნობდა თავს.
„ცალი ფილტვი ჰქონდა და ასე ცხოვრობდა, დაამარცხა ვირუსიც. მადლობა ღმერთს და ექიმებს, რომლებიც ჯარისკაცებივით ბრძოლის ველზე იყვნენ, თავზე ადგნენ და გამომიჯანმრთელეს მამა.
ამბობენ, რომ ასაკოვან ადამიანებს უფრო ებრძვის ვირუსი და შიშის გრძნობა ჰქონდა, თუმცა მაინც შეძლო თავის გამხნევება და გამოჯანმრთელება“, – ამბობს ბიჭიკო მჟავანაძე.
მისი თქმით, აკაკი მჟავანაძე ამ დროისთვის სოფელშია და თავს მხნედ გრძნობს.
ბიჭიკო მჟავანაძის თქმით, მის ოჯახში თითქმის ყველამ გადაიტანა ვირუსი, კლინიკაში კი მხოლოდ აკაკი მჟავანაძე მკურნალობდა.
„სოფელში თითქმის ყველა ადამიანი გრძნობს ვირუსის სიმპტომებს და უჩივის ამ დაავადებას, თუმცა ტესტი ყველას არც გაუკეთებია. როგორც ჩანს, მსუბუქი შემთხვევებია, საბედნიეროდ“, – ამბობს ბიჭიკო მჟავანაძე.
პანდემიის განმავლობაში საქართველოში კოვიდისგან 1 744 ადამიანი გარდაიცვალა, 154 241-მდე ადამიანი კი გამოჯანმრთელდა.
