21 ნოემბრის აჭარის უმაღლესი საბჭოს არჩევნების მეორე ტურზე, რომელზეც ამომრჩევლებს უმაღლესი საბჭოს მაჟორიტარი დეპუტატები უნდა აერჩიათ, „ქართული ოცნების“ კანდიდატებს ამომრჩეველთა ხმების 88 და 89 პროცენტი აქვთ მიღებული.
„ოცნების“ კანდიდატების კონკურენტები ამ ოლქში „ერთიანი ნაციონალური მოძრაობის“ კანდიდატები იყვნენ, თუმცა ოპოზიციურმა პარტიებმა განაცხადეს, რომ ბოიკოტს უცხადებენ მეორე ტურს, რადგან არ ცნობენ 31 ოქტომბერს გამართული არჩევნების ლეგიტიმურობას.
ოპოზიციური პარტიების განცხადებით, 31 ოქტომბერს არჩევნები საქართველოში გაყალბდა, ისინი ითხოვენ ხელახალ არჩევნებს და არ აპირებენ შესვლას საქართველოს პარლამენტსა და აჭარის უმაღლეს საბჭოში.
უსკომ, უმაღლესმა საარჩევნო კომისიამ, უკვე გამოაქვეყნა არჩევნების წინასწარი მონაცემები. დათვლილია ყველა უბანი. უსკოს მონაცემები ასე გამოიყურება:
[checklist]
- ბათუმის #28 მაჟორიტარული ოლქი
[/checklist]
- ტიტე აროშიძე, „ქართული ოცნება“ – 88%, 30172 ხმა
- გიორგი კირთაძე, „ერთიანი ნაციონალური მოძრაობა“ – 12%, 4115 ხმა
[checklist]
- ხელვაჩაურის, ქედის, შუახევისა და ხულოს #30 მაჟორიტარული ოლქი
[/checklist]
- ფრიდონ ფუტკარაძე, „ქართული ოცნება“ – 89.19%, 32649 ხმა
- გია აბულაძე, „ერთიანი ნაციონალური მოძრაობა“ – 10.81%, 3956 ხმა
N28 ბათუმის მაჟორიტარულ ოლქში არჩევნებში მონაწილეობა მიიღო მხოლოდ 35 852-მა ამომრჩეველმა, რაც 24,35 % შეადგენს.
ხოლო N30 მაჟორიტარულ ოლქში არჩევნებში მონაწილეობა მიიღო 37 981-მა ამომრჩეველმა, ამ ოლქში 73 833 ამომრჩეველია რეგისტირებული.
