ჩხენკელი: უფროსკლასელები სკოლას ამ სემესტრში დაუბრუნდებიან

კონკრეტული თარიღი არ დაუსახელებია, თუმცა დღევანდელ ბრიფინგზე საქართველოს განათლების მინისტრმა მიხეილ ჩხენკელმა თქვა, რომ უფროსკლასელები [VII-XII კლასები] საკლასო ოთახებს მიმდინარე სემესტრში დაუბრუნდებიან.

„ეს დამოკიდებულია ეპიდსიტუაციაზე, ეს ამ სემესტრში მოხდება და წინასწარ ამის შესახებ ვამცნობთ საზოგადოებას. საჭიროა სამედიცინო რეკომენდაციების ზედმიწევნით დაცვა,“ – აღნიშნა მიხეილ ჩხენკელმა. მისი თქმით, გადაწყვეტილება არ ეხება აჭარის რეგიონს, სადაც სასწავლო პროცესი კლასებში არ განახლებულა. განათლების მინისტრმა ასევე თქვა, რომ თუკი მშობლებს სურვილი ექნებათ, შესაძლებელი იქნება მოსწავლეები დისტანციური სწავლების რეჟიმში დარჩნენ.

განათლების მინისტრის თქმით, ამ კვირის ოთხშაბათს, ხუთშაბათს და პარასკევს ის სკოლები გადავლენ დისტანციურ რეჟიმზე, სადაც საარჩევნო უბნებია გახსნილი. ეს გადაწყვეტილება საარჩევნო უბნების მოსამზადებლად მიიღეს.

მიხეილ ჩხენკელმა ისაუბრა უნივერსიტეტებზეც. მისი განმარტებით, უნივერსიტეტებში მხოლოდ პრაქტიკული და ლაბორატორიული მეცადინეობისთვის იკრიბებიან.

„მათ აქვთ მაქსიმალურად მოქნილი გრაფიკი იმისთვის, რომ დაცული იყოს დისტანცია. საუნივერსიტეტო სივრცეში სტუდენტი, პროფესორი, ყველანი არიან პირბადით… ჩვენ ვახდენთ უნივერსიტეტებზე დაკვირვებას და თუ იქნება გადაცდომა, იქნება რეაქცია,“ – თქვა განათლების მინისტრმა, მიხეილ ჩხენკელმა.