საქართველოს განათლების სამინისტრომ 6 350 ცალი ლეპტოპისა და 898 პროექტორის შესყიდვაზე ელექტრონული ტენდერი გამოაცხადა. შესყიდვის სავარაუდო ღირებულება ჯამში 12 მილიონ 537 ათასი ლარია. სამინისტრო აღნიშნულ ტექნიკას დონორის – მსოფლიო ბანკის დაფინანსებით შეიძენს.
განათლების სამინისტროს შესყიდვების სამმართველოში „ბათუმელებს“ უთხრეს, რომ ლეპტოპები და პროექტორები გათვალისწინებულია პედაგოგებისთვის და ისინი გადანაწილდება საჯარო სკოლებში მთელი ქვეყნის მასშტაბით:
„სკოლების სია არის, ის გადაცემულია საგანმანათლებლო და სამეცნიერო ინფრასტრუქტურის განვითარების სააგენტოსთვის (ESIDA) და შემდგომში შეძენილი ტექნიკის სკოლებისთვის მიწოდებასაც აღნიშნული სააგენტო უზრუნველყოფს.“
ESIDA-სთვის საქონლის მიწოდების ვადა, ტენდერის პირობის მიხედვით, შესაბამისი ხელშეკრულების გაფორმებიდან 4 თვეა. ტენდერში მონაწილე პრეტენდენტს კი, ერთ-ერთი პირობით „უნდა ჰქონდეს მინიმალური საშუალო წლიური ბრუნვა 6 მილიონი აშშ დოლარი, ან ექვივალენტი ლარში – ბოლო სამი წლის განმავლობაში (2017-2018-2019 წწ)“.
წინადადებების მიღება იწყება 2020 წლის 12 ნოემბერს და მთავრდება 16 ნოემბერს. სატენდერო დოკუმენტაციის ნებისმიერი ცვლილების შესახებ შიდა შეტყობინება კი გაეგზავნება მხოლოდ იმ მიმწოდებელს, რომელიც დოკუმენტის ნახვის წინ გაივლის ავტორიზაციას შესყიდვების ელექტრონულ სისტემაში.
