„ერთიანი ნაციონალური მოძრაობა“ ხელვაჩაურის მერს, ჯუმბერ ვარდმანიძეს თანამდებობის დატოვებისკენ მოუწოდებს. მიზეზი ხელვაჩაურის მერის მხრიდან ონლაინგამოცემა „ბათუმელებისთვის“ შეურაცხყოფის მიყენებაა – ხელვაჩაურის მერის აგრესია წინასაარჩევნო კამპანიის დროს სამსახურებრივი ავტომანქანით გადაადგილების შესახებ დასმულმა კითხვამ გამოიწვია. აუდიოჩანაწერი „ბათუმელებმა“ გუშინ, 12 ოქტომბერს გამოაქვეყნა.
„წლების განმავლობაში ჩვენ ვსაუბრობდით კორუფციულ გარიგებებზე ხელვაჩაურის მუნიციპალიტეტში, ამას მოწმობს აუდიტის დასკვნებიც, რომლებიც გამოქვეყნდა 2017, 2018 და 2019 წლებში. ჩვენ არაერთხელ მოვუწოდეთ გამოძიებას, დაინტერესებულიყვნენ ამ ფაქტებით, თუმცა უშედეგოდ.
ამავე წლებში ჩვენ არაერთმა მოქალაქემ გვითხრა, რომ ხელვაჩაურის მერი ხმამაღლა ესაუბრა და კაბინეტიდან გამოაგდო, ჩვენ გვიჭირდა ამის დაჯერება, მაგრამ „ბათუმელების“ აუდიოჩანაწერით დადასტურდა, როგორ იქცევა ხელვაჩაურის მერი. ის არ არის ღირსი, რომ იყოს მერი. ჩვენ მას მოვუწოდებთ, დატოვოს ეს თანამდებობა,“ – ამბობს მიშა ბოლქვაძე, ხელვაჩაურის, ქედის, შუახევის და ხულოს მაჟორიტარი დეპუტატობის კანდიდატი პარლამენტში „ერთიანი ნაციონალური მოძრაობიდან“.
მიშა ბოლქვაძის თქმით, ხელვაჩაურის საკრებულოში „ნაციონალური მოძრაობა“ მერის იმპიჩმენტის მომხრეცაა, თუმცა არასაკმარისი ხმების გამო იმპიჩმენტის პროცედურა არ დაწყებულა.
მიშა ბოლქვაძე
