Batumelebi | არ უნდა დაიტესტონ, პირდაპირ უნდა წავიდნენ იზოლაციაში – აჭარის ჯანდაცვის მინისტრი არ უნდა დაიტესტონ, პირდაპირ უნდა წავიდნენ იზოლაციაში – აჭარის ჯანდაცვის მინისტრი – Batumelebi
RU | GE  

არ უნდა დაიტესტონ, პირდაპირ უნდა წავიდნენ იზოლაციაში – აჭარის ჯანდაცვის მინისტრი

აჭარის ჯანდაცვის მინისტრმა ნინო ნიჟარაძემ დღეს, 28 სექტემბერს ბრიფინგზე უპასუხა შეკითხვას PCR ტესტირების მიზნობრიობის შესახებ. დღეიდან ბათუმის მხოლოდ ორ პოლიკლინიკაში ხდება უფასო ტესტირება და ისიც – სამი საათის განმავლობაში, რამაც ბათუმში პოლიკლინიკებთან რიგები და მოქალაქეების უკმაყოფილება გამოიწვია.

ნინო ნიჟარაძის განცხადებით, არ არის საჭირო კოვიდინფიცირებულთან კონტაქტში მყოფმა ყველა პირმა ჩაიტაროს ტესტირება.

„მინდა მოქალაქეების საყურადღებოდ ვთქვა, როდესაც გავიგებთ, რომ ჩვენს ირგვლივ ვიღაცას დაუდასტურდა კორონავირუსი, ყველას უნდა, მაშინვე გაიქცეს, გადაამოწმოს და მოისვენოს, რომ ტესტი უარყოფითია. თუ კი ვიცით, რომ კოვიდინფიცირებულთან კონტაქტში ვიყავით, ვალდებული ვართ 12 დღე ვიყოთ იზოლაციაში. ის, რომ ჩვენ დღეს ვართ უარყოფითი, არ ნიშნავს, რომ ორი დღის შემდეგაც უარყოფითი ვიქნებით. შესაბამისად, ეს ვალდებულება გაგვაჩნია.

…არ უნდა დაიტესტონ, პირდაპირ უნდა წავიდნენ იზოლაციაში. ვინაიდან კონტაქტში მყოფი პირი თავისით არ უნდა მოძრაობდეს ქუჩაში, ის უნდა იყოს იზოლაციაში 12 დღის განმავლობაში“ – განაცხადა ნინო ნიჟარაძემ.

მან ასევე აღნიშნა, რომ თუ კი კოვიდინფიცირებულთან კონტაქტში მყოფი პირი ეპიდემიოლოგებს ჰყავთ აღრიცხული, შემთხვევის დადასტურებიდან მეოთხე-მუხეთე დღეს მას მიაკითხავენ და ბინაზე ჩაუტარებენ ტესტირებასა და დიაგნოსტიკას.

„ყველაზე მეტი ალბათობა დაავადების დაწყებისა, სწორედ ეს პერიოდი გახლავთ. შესაბამისად, საწყის პერიოდში ტესტირება და პოლიკლინიკებში მიმართვიანობა უფრო მეტ რისკს ბადებს.

როდესაც ტესტირების საათები შეიზღუდა, ესეც მწვავე თემა გახდა. მინდა მოქალაქეებს ვთხოვო, ძალიან გაგებით მოეკიდონ. ტესტირების ჩატარებას უნდა ჰქონდეს მიზნობრივი დატვრითვა, აუცილებელია ტესტირებას იტარებდეს ინფიცირებულის ახლო კონტაქტი, მაგრამ ის უნდა იყოს იზოლაციაში. დღევანდელი უარყოფითი პასუხი არ არის გარანტია 5 დღის მერეც უარყოფითი პასუხის.

თუ ადამიანს არ ეწყება სიმპტომები, ის უბრალოდ უნდა იყოს იზოლაციაში. 112-ზე შეტყობინებაც არ არის საჭირო, ვინაიდან ამის შესახებ ინფორმაცია გვაქვს და ასეთ ადამიანს მიაკითხავენ მაინც, მეოთხე-მუხეთე დღეს“.

კითხვაზე, საიდან ექნება ინფორმაცია ამის შესახებ ეპიდემიოლოგიურ სამსახურს, თუ, მაგალითად, კოვიდინფიცირებულმა არ მიაწოდა მათ საკონტაქტო პირების სრული სია, ნინო ნიჟარაძემ აღნიშნა, რომ საუბარია ისეთ პირებზე, რომლებიც აღრიცხულნი იქნებიან, როგორც ინფიცირებულებთან კონტაქტში მყოფი პირები.

ამავე თემაზე: 

უფასო PCR ტესტირებისთვის გამოყოფილი 3 საათი და რიგები ბათუმის პოლიკლინიკებთან

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com