დღეს, 28 სექტემბერს, ბათუმში რიგები გაჩნდა იმ პოლიკლინიკებთან, სადაც მოქალაქეებს კორონავირუსზე უფასო ტესტირება შეეძლოთ. აქამდე ბათუმში მოქალაქეებს 5 პოლიკლინიკაში შეეძლოთ უფასო ტესტირება, თუმცა, დღეის მდგომარეობით, ტესტირება უფასოდ მხოლოდ ორ პოლიკლინიკაშია შესაძლებელი: ბარათაშვილის ქუჩაზე მდებარე საოჯახო მედიცინის ცენტრსა და ბათუმის #1 პოლიკლინიკაში, რომელიც რესპუბლიკურ საავადმყოფოსთან ახლოს მდებარეობს.
„ბათუმელები“ რამდენიმე მოქალაქეს ესაუბრა, ვინც დღეს უფასო ტესტირება გაიარა. ისინი ამბობენ, რომ რიგი პოლიკლინიკებთან არაორგანიზებული იყო, არ იყო დაცული დისტანცია მოქალაქეებს შორის, იყო „ნაცნობების“ ურიგოდ შეყვანის ფაქტები და ა.შ. მოქალაქეების უკმაყოფილებას კიდევ უფრო ზრდის ის ფაქტი, რომ ტესტირების საათები შემცირდა, ახლა უფასო ტესტირება მხოლოდ დილის 11 საათიდან 14 საათამდეა შესაძლებელი.
პოლიკლინიკებთან რომ რიგები შეიქმნა, ამას სამედიცინო დაწესებულებებში ადასტურებენ. ბათუმის #1 პოლიკლინიკის დირექტორმა, თენგიზ შერვაშიძემ გვითხრა, რომ უფასო ტესტირება ხვალ და შემდეგ დილის 11-დან 14 საათამდე გაგრძელდება, „თუ რაიმე განკარგულება არ მოვიდა“.
ბათუმში, ბარათაშვილის ქუჩაზე მდებარე საოჯახო მედიცინის რეგიონულ ცენტრთან ხალხმრავალი რიგის მოსაწესრიგებლად დღეს პოლიციის დახმარებაც დასჭირდათ.
„ორზე უნდა დაგვესრულებინა მიღება, მაგრამ ხალხი არ წავიდა, პოლიცია დაგვეხმარა, საშინელი უსიამოვნება იყო. პოლიცია კი გვეხმარება, მაგრამ შეჯგუფული ხალხი ეპიდსაშიშია. სადღაც ორის ნახევარზე შევწყვიტე ცოცხალ რიგში ჩაწერა, მეტი აღარ ჩაეწეროთ და ვინც ჩაეწერა, ყველას მოგემსახურები-მეთქი და რეალურად იმდენი ყოფილა ჩაწერილი, ნახევარი საათი არ აღმოჩნდა საკმარისი. სიტყვა უკვე ნათქვამი მქონდა და ეს ხალხი ვეღარ გავაბრუნე“, – გვითხრა ბარათაშვილის ქუჩაზე მდებარე საოჯახო მედიცინის რეგიონული ცენტრის დირექტორმა ბექა იოსელიანმა.
მისივე თქმით, ტესტირებისათვის განკუთვნილი დროის შესახებ გუშინ მიიღეს ინფორმაცია სამინისტროდან და ეს უკავშირდება ტესტირების მიზნობრიობას:
„მიზეზი არის შემდეგი, 80 პროცენტი ვინც იკეთებს ტესტირებას, არიან ადამიანები, რომლებსაც კონტაქტი არ ჰქონიათ ინფიცირებულ პირებთან და არც სიმპტომები აქვთ. შესაბამისად, როგორც ამიხსნეს, ცდილობენ მაქსიმალურად მიზნობრივ ჯგუფებამდე დაიყვანონ სკრინინგი და საათებიც შეამცირეს, რომ სერვისი გადავიდეს ძირითადად დადასტურებული შემთხვევების კონტაქტებისა და სიმპტომების მქონე პაციენტების ტესტირებაზე“.
ბექა იოსელიანი ასევე აღნიშნავს, რომ დიდი რიგები საშიშია ვირუსის გავრცელების თვალსაზრისით: „300 ადამიანი რომ მოდის, აქედან 200-ს არანაირი სიმპტომი არა აქვს, მაგრამ 50-ს აქვს სიმპტომები და ამ რიგში ის 200 ადამიანიც დარტყმის ქვეშ დგას“, – ამბობს ბექა იოსელიანი.
რატომ შემცირდა ბათუმში იმ კლინიკების ჩამონათვალი, სადაც უფასო ტესტირება იყო შესაძლებელი, რატომ შემცირდა ტესტირებისთვის განკუთვნილი დრო და ეს როგორ უზრუნველყოფს ტესტირების მიზნობრიობას? – ამის შესახებ გვინდოდა აჭარის ჯანდაცვის მინისტრისთვის, ნინო ნიჟარაძისთვის გვეკითხა, თუმცა მან, ჯერჯერობით, ჩვენს სატელეფონო ზარებს არ უპასუხა. ამ ინფორმაციის მიღება ვერც აჭარის ჯანდაცვის სამინისტროში შევძელით.
_______________
რიგი PCR ტესტირებაზე. ფოტო: „ბათუმელები“
