Batumelebi | ვარშალომიძე ბათუმში „ოცნების“ კანდიდატზე: ის კარგი პოლიციელი იყო ვარშალომიძე ბათუმში „ოცნების“ კანდიდატზე: ის კარგი პოლიციელი იყო – Batumelebi
RU | GE  

ვარშალომიძე ბათუმში „ოცნების“ კანდიდატზე: ის კარგი პოლიციელი იყო

ერთიანი ნაციონალური მოძრაობის მაჟორიტარი დეპუტატობის კანდიდატი ბათუმში, ლევან ვარშალომიძე, თავის კონკურენტზე, „ქართული ოცნების“ მაჟორიტარობის კანდიდატზე, რესან კონცელიძეზე ამბობს, რომ „ის კარგი პოლიციელი იყო“.

ეს განცხადება ვარშალომიძემ ტვ პირველის ეთერში გააკეთა. ჟურნალისტმა ვარშალომიძეს ჰკითხა, მისი აზრით, რესან კონცელიძეს, რომელიც არაერთი წელი მუშაობდა პოლიციაში, თავად გაუჩნდა პოლიტიკაში წასვლის ამბიცია, თუ ეს არ იყო მისი გადაწყვეტილება.

„ბათუმში ყველა ერთმანეთს იცნობს, ჩვენი ხელისუფლების დროს მართლაც იმყოფებოდა შინაგან საქმეთა სამინისტროში, მუშაობდა მაღალ თანამდებობებზე, მაგრამ დღევანდელი გადაწყვეტილება როგორ მიიღო, ალბათ, მას ვკითხოთ სჯობია. როგორც პოლიციელი კარგი იყო, მუშაობდა და როგორც ყველა პოლიციელი ასრულებდა შინაგან საქმეთა სამინისტროს და მინისტრის დავალებებს,“ – თქვა ლევან ვარშალომიძემ.

ლევან ვარშალომიძის თქმით, მათი მთავარი კონკურენტი ბათუმში „ივანიშვილის რუსული ოცნებაა“.

„31 ოქტომბერს ერთადერთი მოწინააღმდეგე არის ბიძინა ივანიშვილის „რუსული ოცნება“. ერთადერთი გამოწვევა, რომელიც ჩვენ გვაქვს ეს არის სიღარიბე. ერთადერთი მოწინააღმდეგე ბათუმში და არამარტო ბათუმში და მთელ საქართველოში ჩვენ გვყავს ბიძინა ივანიშვილი. ბათუმში კონკრეტულად გვყავს ბიძინა ივანიშვილის ჩაზნექილი სკამები. ყველაზე დიდი გამოწვევა საქართველოში რაც არის, ეს არის სიღარიბე. სიდუხჭირე არის ყველაზე დიდი მტერი, რომელიც ჩვენ ერთად უნდა დავამარცხოთ. ამის კონკრეტული გეგმაც გვაქვს. აქედან გამომდინარე თითოეულ მაჟორიტარობის კანდიდატთან გვექნება საუბარი,“ – თქვა ლევან ვარშალომიძემ.

ნეტგაზეთის მასალების სხვა გამოცემებში გადაბეჭდვის წესი
ავტორი