„დღეის მდგომარეობით დაჯარიმდა ორი ობიექტი, სადაც დარღვეული იყო სოციალური თავშეყრის ოდენობა. აღნიშნულთან დაკავშირებით გამოეცათ მათ საჯარიმო,“ – აღნიშნა აჭარის პოლიციის დეპარტამენტის უფროსმა, კოტე ანანიაშვილმა. დღეს, 10 სექტემბერს, აჭარის მთავრობაში შრომის ინსპექციის ხელმძღვანელი სხვადასხვა უწყების წარმომადგენელს შეხვდა, მათ შორის, აჭარის პოლიციის უფროსს.
კოტე ანანიაშვილმა არ დააკონკრეტა, რომელი ობიექტები დაჯარიმდნენ. „ეს იყო სარიტუალო დარბაზები, სადაც იმართება საქორწინო ცერემონიები,“ – თქვა მან.
აჭარის პოლიციის უფროსმა ასევე განმარტა, რომ რამდენიმე შეხვედრა გაიმართა ბიზნესის წარმომადგენლებთან და მათ არსებული რეგულაციები გააცნეს.
„მინდა მოვუწოდო კვების ყველა ობიექტს, დაიცვან წესები, დადგენილი რეგულაციები, წინააღმდეგ შემთხვევაში, შინაგან საქმეთა სამინისტრო, ჯანდაცვის სამინისტროსთან ერთად, მკაცრ მონიტორინგს განახორციელებს და იძულებული ვიქნებით, გამოვიყენოთ საჯარიმო სანქციები,“ – განაცხადა კოტე ანანიაშვილმა.
დღეს, 10 სექტემბერს, ბათუმში კორონავირუსით დაინფიცირების 27 შემთხვევა დაფიქსირდა, ქვეყნის მასშტაბით კი – 57.
