Batumelebi | მოაწესრიგეს თუ არა აჭარაში სკოლებმა სველი წერტილები სწავლის დაწყების წინ მოაწესრიგეს თუ არა აჭარაში სკოლებმა სველი წერტილები სწავლის დაწყების წინ – Batumelebi
RU | GE  

მოაწესრიგეს თუ არა აჭარაში სკოლებმა სველი წერტილები სწავლის დაწყების წინ

ოფიციალური მონაცემებით აჭარაში 229 საჯარო სკოლაა, მათგან დაახლოებით 95 პროცენტს სასწავლო პროცესის დაწყებამდე სველი წერტილების მოწესრიგება დასჭირდა. აჭარის განათლების სამინისტროში ირწმუნებიან, რომ  სკოლების უმეტესობა შრომის ინსპექციისგან დადებით შეფასებას მიიღებს.

„ჩვენ სველი წერტილების და სხვა ინფრასტრუქტურის მოწესრიგება სკოლებში ჯერ კიდევ იანვრიდან დავიწყეთ, შევადგინეთ ცხრილი, თუ რომელ სკოლას რა პრობლემა ჰქონდა და დავიწყეთ მუშაობა.

დაახლოებით 20-მდე სკოლაში სველი წერტილების მოწესრიგება სამინისტრომ უზრუნველყო, სკოლების გარკვეულმა ნაწილმა  კი პანდემიის პერიოდში დაზოგილი თანხებით მოაწესრიგა სველი წერტილები,“ – თქვა „ბათუმელებთან“ აჭარის განათლების მინისტრის მოადგილემ, ჯემალ სურმანიძემ.

მისი თქმით, სკოლებში სველი წერტილების მოწესრიგების პროცესი ჯერ კიდევ არ არის დასრულებული და შესაძლოა სამუშაოები ოქტომბერში ან უფრო გვიან გადაიწიოს.

„იმ შემთხვევაში, თუ სველი წერტილების ან სხვა სამუშაოების დასრულება ვერ მოესწრება, სკოლებს ექნებათ ალტერნატიული სველი წერტილები. მაგალითად, იმ სკოლებში, სადაც სველი წერტილები არ არის შენობაში, სადაც შესაძლებელი იყო, სველი წერტილი სკოლის შენობაში გადმოვიტანეთ, თუმცა გარეთ არსებული სველი წერტილებიც მოვაწესრიგეთ, რომ თუ ახალი ვერ მოესწრება, ძველი გამოიყენონ“, – ამბობს ჯემალ სურმანიძე.

კითხვაზე, არის თუ არა აჭარაში ისეთი სკოლები, სადაც არ აქვთ უწყვეტი წყალმომარაგება, ჯემალ სურმანიძე პასუხობს, რომ ამაზე დაზუსტებულ ინფორმაციას არ ფლობს. „კონკრეტულ სკოლას ვერ დაგისახელებთ, რომელსაც შეიძლება ეს პრობლემა ჰქონდეს, ზოგადი ინფორმაცია რაც მაქვს, ვიცი, რომ წყლის პრობლემა სკოლებში არ დგას“, – გვითხრა მან.

მინისტრის მოადგილის თქმით, სკოლებში ინფრასტრუქტურის მოწესრიგების ხაზი ძირითადად სველ წერტილებზე გადის:„იმ სკოლებს კი, სადაც ერთი შეხედვით სისტემა გამართულია, მაგრამ ინვენტარია გამოსაცვლელი, მაგალითად, დაჟანგულია ნიჟარა ან წყალი ჟონავს, მიეცათ აქსესუარების გამოცვლის რეკომენდაცია. ზოგან საჭირო იყო მოპირკეთება და ასე შემდეგ“.

ჯემალ სურმანიძე ამბობს, რომ დეზობარიერებისა და ანტიბაქტერიული საშუალებების შეძენაზე კონსოლიდირებული ტენდერი უკვე გამოცხადებულია და სკოლებს დეზობარიერები სწავლის დაწყების წინ მიეწოდება.

ოფიციალური ინფორმაციით, საჯარო სკოლებში ახალი სასწავლო წელი 15 სექტემბერს უნდა განახლდეს, თუმცა მანამდე ყველა სკოლამ, მათ შორის, კერძო სკოლებმაც, ინსპექტირება უნდა გაიარონ. იმ შემთხვევაში, თუკი შრომის ინსპექცია უარყოფით დასკვნას დადებს, სკოლა მუშაობას ვერ განაახლებს.

ამ ეტაპზე ჯერჯერობით ისევ დაუზუსტებელია, სკოლები შერეული სისტემით იმუშავებენ, თუ ტრადიციულით, თუმცა ყველა შემთხვევაში სკოლა ვალდებულია დააკმაყოფილოს ჯანდაცვის უწყებების მიერ მითითებული კოვიდუსაფრთხოების ყველა სტანდარტი.

______________________________

მთავარი ფოტო: სველი წერტილი სკოლაში/„ბათუმელების“ არქივი

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com