Batumelebi | სასამართლომ არ დააკმაყოფილა აჭარის ტელევიზიიდან ჩამოშორებული რედაქტორის სარჩელი სასამართლომ არ დააკმაყოფილა აჭარის ტელევიზიიდან ჩამოშორებული რედაქტორის სარჩელი – Batumelebi
RU | GE  

სასამართლომ არ დააკმაყოფილა აჭარის ტელევიზიიდან ჩამოშორებული რედაქტორის სარჩელი

ბათუმის საქალაქო სასამართლომ აჭარის ტელევიზიის ყოფილი რედაქტორის, მაია მერკვილაძის სარჩელი არ დააკმაყოფილა.

“თქვენ იგივე ფუნქციით და ხელფასით განაგრძობთ მუშაობას,” – აღნიშნა მოსამართლე ალექსანდრე გოგუაძემ გადაწყვეტილების სარეზოლუციო ნაწილის გამოცხადების შემდეგ.

24 თებერვალს აჭარის ტელევიზიის საინფორმაციო სამსახურის უფროსის ყოფილი მოადგილე – მაია მერკვილაძე საინფორმაციო სამსახურს ჩამოაშორეს. მას გიორგი კოხრეიძემ არარსებული თოქ-შოუს პროდუსერობა შესთავაზა. საინფორმაციო სამსახურში რედაქტორად ნინო ხაჟომია დანიშნეს. აჭარის ტელევიზიის საინფორმაციო გამოშვების ყოფილი რედაქტორი – მაია მერკვილაძე სასამართლოში იმ სამართლებრივი აქტის ბათილად ცნობას ითხოვდა, რომლითაც მისი შტატი ტელევიზიაში საერთოდ გააუქმეს.

მაია მერკვილაძე ამ დროისთვის აჭარის რადიოში რედაქტორად მუშაობს.

მოსამართლემ აჭარის ტელევიზიის საინფორმაციო სამსახურს ჩამოშორებულ ყოფილ რედაქტორს ასევე უთხრა, რომ აჭარის ტელევიზიის დირექტორის მიერ მიღებულ გადაწყვეტილებას “პირდაპირი და უშუალო ზიანი” მოსარჩელისთვის არ მიუყენებია, ხოლო არსებითი დარღვევები არ გამოვლენილა.

“ამ გადაწყვეტილებით თუ არაფერი შეცვლილა, არ ვიცი. ჩვენ ამ გადაწყვეტილებას აუცილებლად გავასაჩივრებთ,” – უთხრა მაია მერკვილაძემ მოსამართლეს, ვიდრე იგი სასამართლო დარბაზს დატოვებდა.

ნეტგაზეთის მასალების სხვა გამოცემებში გადაბეჭდვის წესი
ავტორი