Batumelebi | 200-ლარიანი დახმარების პორტალზე უკვე 772 000 ბავშვი დარეგისტრირდა 200-ლარიანი დახმარების პორტალზე უკვე 772 000 ბავშვი დარეგისტრირდა – Batumelebi
RU | GE  

200-ლარიანი დახმარების პორტალზე უკვე 772 000 ბავშვი დარეგისტრირდა

სოციალური მომსახურების სააგენტოს მიერ „ბათუმელებისთვის“ მოწოდებული მონაცემებით, 200-ლარიანი დახმარების პორტალზე, 25 აგვისტოს 10 საათის მდგომარეობით, სულ რეგისტრირებულია 772 000 ბავშვი. მოზარდების რეგისტრაცია 15 აგვისტოს დაიწყო. პორტალზე ამ დროისთვის 459 000 ოჯახია რეგისტრირებული [ბავშვებს პროგრამაში მშობელი არეგისტრირებს-ავტ.].

უკვე დარეგისტრირებული ბავშვებისთვის ბიუჯეტიდან 154 400 000 ლარი დაიხარჯება. თუმცა რეგისტრაცია გრძელდება და, შესაბამისად, ამ პროგრამის განხორციელებისთვის ბიუჯეტის ხარჯები კიდევ უფრო გაიზრდება.

2020 წლის იანვრის მონაცემებით, ქვეყანაში 18-წლამდე 880 375 მოზარდი ცხოვრობს.

სააგენტოს ინფორმაციით, თანხის დარიცხვა მშობლების მიერ მითითებულ საბანკო ანგარიშის ნომრებზე 2020 წლის სექტემბრიდან დაიწყება. აღნიშნულ დახმარებებზე ყადაღა არ ვრცელდება.

რაც შეეხება რეგისტრაციას, მშობლებს 0-დან 18 წლამდე ჩათვლით ბავშვებისა და მოზარდების 200-ლარიანი დახმარების მისაღებად სპეციალურ პორტალზე დარეგისტრირება 2020 წლის პირველ დეკემბრამდე შეუძლიათ.

ელექტრონულ პორტალზე განცხადების შესავსებად გადადით ამ ბმულზე

ელექტრონულ პორტალზე დოკუმენტების ატვირთვა დღე-ღამის ნებისმიერ მონაკვეთში შეიძლება.

ელექტრონულ პორტალზე უნდა განთავსდეს შემდეგი სახის ინფორმაცია:

  • ბავშვის სახელი, გვარი, დაბადების თარიღი, პირადი ნომერი;
  • მშობლის/კანონიერი წარმომადგენლის სახელი, გვარი, პირადი ნომერი;
  • მშობლის/კანონიერი წარმომადგენლის სახელზე კომერციულ საბანკო დაწესებულებაში გახსნილი საბანკო ანგარიშის რეკვიზიტები (ბანკის ანგარიშის ნომერი);
  • საკონტაქტო მობილური, რომელზეც მოკლე ტექსტურ შეტყობინებებს მიიღებენ.

თუ ფიზიკური პირი ელექტრონულ პორტალზე რეგისტრაციის გავლას ვერ ახერხებს, მან უნდა მიმართოს:

  • სოციალური მომსახურების სააგენტოს ნებისმიერ ტერიტორიულ ერთეულს;
  •  საქართველოს რეგიონული განვითარებისა და ინფრასტრუქტურის სამინისტროს;
  • ადგილობრივ თვითმმართველობებს;
  • იუსტიციის სახლებსა და საზოგადოებრივ ცენტრებს;
  • „ლიბერთი ბანკის“ ფილიალებს.

დამატებითი ინფორმაციის მიღება შესაძლებელია საქართველოს ჯანდაცვის სამინისტროს ცხელ ხაზზე – 1505

ამავე თემაზე:

რა ვუთხრათ ბავშვებს 200 ლარის შესახებ?

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com