Batumelebi | ვინ და როგორ აშენებს მომავლის “ოცნების ქალაქს” ვინ და როგორ აშენებს მომავლის “ოცნების ქალაქს” – Batumelebi

ვინ და როგორ აშენებს მომავლის “ოცნების ქალაქს”

ქალაქ ბათუმის ტერიტორიაზე არსებულ დასახლება „ოცნების ქალაქში“ 2000-მდე ოჯახი ცხოვრობს. სახლებს, უმეტესად, რამდენიმე კვადრატული მეტრი ფიცრებისა და თუნუქის ფირფიტებისგან შეკრული შენობები წარმოადგენს. „ოცნების ქალაქი” მჭიდროდაა დასახლებული.

Google earth-ით დანახული “ოცნების ქალაქის” ტერიტორია

აქ მცხოვრები ადამიანები წლებია ითხოვენ ნორმალურ საცხოვრებელ პირობებს. მათ შორისაა მაია ბოლქვაძე.

მაია ბოლქვაძე, „ოცნების ქალაქის“ მცხოვრები: „მარტოხელა, მრავალშვილიანი დედა ვარ, მყავს ხუთი შვილი, უფროსი უკვე უნივერსიტეტში სწავლობს, ტყუპები კი შვიდი წლისანი არიან. მალე 9 წელი გავა, რაც აქ ვცხოვრობ. არ მქონდა ქირის გადახდის საშუალება და აქ შემოვსახლდი. დღემდე თავი გამაქვს სოციალური დახმარების წყალობით, ბავშვების გამო მუშაობას ვერ ვახერხებ“.

მაია ბოლქვაძე “ოცნების ქალაქიდან”

აქ იყო გაუსაძლისი პირობები, არ იყო დენი, წყალი, დღემდე არ არის კანალიზაცია, მოუწესრიგებელია გზები. უიმედო წლების შემდეგ ახლა დაიწყო კორპუსების მშენებლობა და ყველა ასაკის აქ მცხოვრებ ადამიანს გაუჩნდა იმედი, რომ ნორმალურ პირობებში იცხოვრებს და ექნება სახლი. ახალ კორპუსში, როგორც ამბობენ, თეთრი კარკასი იქნება. ყველას ძალიან უხარია.

ოცნების ქალაქი

„ოცნების ქალაქში“ დაახლოებით 1000 ბავშვი ცხოვრობს. მჯერა, პროცესები ისე წარიმართება, რომ ყველა ის მხარე, რომელიც გადაწყვეტილებას იღებს, ბავშვებს არ დატოვებს სახლის გარეშე“, – ამბობს მაია.

„ოცნების ქალაქში“ ამჟამად საცხოვრებელ სახლებს სამშენებლო კომპანია „დაგი“ აშენებს. მისი წარმომადგენელის, თამუნა ჩხეტიას თქმით, კომპანიისთვის საამაყოა ამ პროექტში მონაწილეობა.

„582 ბინაზე გათვლილი, სამი 12-სართულიანი კორპუსი შენდება „ოცნების ქალაქის“ ტერიტორიაზე, ბათუმში. სახლები გათვლილია სოციალურად დაუცველი მოსახლეობისთვის.

მშენებლობა აქტიურად მიმდინარეობს

დასაქმებულთა რაოდენობა ყოველდღიურად იმატებს, ამ დროისათვის დაახლოებით 200-მდე ადამიანია დასაქმებული, მათი დიდი ნაწილი ადგილობრივია. სამუშაოებში პერიოდულად „ოცნების ქალაქში“ მცხოვრები ადამიანებიც ერთვებიან.

მშენებლობა წლის დასაწყისში დაიწყო და მომდევნო წლის ზაფხულში ვგეგმავთ ჩაბარებას. ნამდვილად ძალიან საამაყოა, როცა იცი, რომ აშენებ კორპუსებს, რომლებშიც ის ადამიანები იცხოვრებენ, ვისაც ბინა არ აქვთ“.

სამშენებლო კომპანია დაგი 2003 წელს დაარსდა და შექმნიდან დღემდე ეწევა სამშენებლო-სარემონტო-სარეკონსტრუქციო სამუშაოებს ხარისხის კონტროლის სრული დაცვით, რასაც განაპირობებს კომპანიის მრავალწლიანი გამოცდილება და კვალიფიციური ინჟინრებისა და არქიტექტორებისგან შემდგარი ერთიანი ჯგუფი.

კომპანიის საქმიანობის სფერო საკმაოდ ფართოა. დაარსებიდან დღემდე კომპანიას 300-ზე მეტი პროექტი აქვს შესრულებული საქართველოს მთელ ტერიტორიაზე. არსებული გამოცდილების გათვალისწინებით, კომპანიის განვითარების სტრატეგია მოიცავს საოფისე ფართობების, საცხოვრებელი შენობების, საზოგადოებრივი პარკების, საავტომობილო ინფრასტრუქტურის, სამელიორაციო და სასმელი წყლის ინფრასტრუქტურის სამშენებლო სამუშაოებს.

კომპანია მუდმივად ცდილობს, მიჰყვეს ტექნოლოგიურ განვითარებას და ინოვაციებს და სამშენებლო პროცესში გამოიყენოს თანამედროვე მასალები და ტექნოლოგიები, რაც იძლევა საშუალებას დამკვეთებისათვის შეთავაზებული იქნას მაქსიმალურად ოპტიმიზირებული ხარჯები და ტექნიკური გადაწყვეტილებები. კომპანიას 2012 წლიდან მინიჭებული აქვს ISO სერტიფიკატი, 2015 წლის ოქტომბრის თვიდან კი  – OHSAS სერტიფიკატი. ასევე, კომპანია 2012 წლის 18 ივნისიდან რეგისტრირებულია სახელმწიფო შესყიდვების სააგენტოს „თეთრ სიაში”, ამ სიაში მხოლოდ მაღალი პასუხისმგებლობის მქონე კომპანიები ხვდებიან.

ნეტგაზეთის მასალების სხვა გამოცემებში გადაბეჭდვის წესი
ავტორი