დღეს, 22 ივლისს, დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელმა ამირან გამყრელიძემ განაცხადა, რომ ახლა საქართველოში ყველაზე „ცხელი წერტილი“ გაჩიანის დასახლებაა ქვემო ქართლში.
„განსაკუთრებულად ცხელი წერტილი ჩვენ დღეს გვაქვს ქვემო ქართლის რეგიონში, გარდაბნის მუნიციპალიტეტში, ე.წ. გაჩიანის დასახლებაში, სადაც სამი სოფელი შედის, აქედან ორ სოფელში – ყალაჯალარში და ყარათაკლიაში გვაქვს შემთხვევების ყველაზე მეტი რაოდენობა, ერთად აღებული 34 შემთხვევა. დღევანდელი 24 შემთხვევიდან 10 სწორედ გაჩიანის კლასტერზე მოდის,“ – განაცხადა ამირან გამყრელიძემ.
მან ჟურნალისტებთან აღნიშნა, რომ ამ სოფლებში შემავალ გზებზე მიმდინარეობს თერმოსკრინინგი და ამ სოფლებში დაიწყო გაფართოებული კვლევა, თუმცა სინჯების აღებისას წინააღმდეგობას აწყდებიან მოსახლეობისგან.
„სამწუხაროდ, ცუდი დამყოლობაა მოსახლეობის. გუშინ იქ დავიწყეთ გაფართოებული კვლევები. სამივე სოფელში დაახლოებით 7 ათასი მოსახლე ცხოვრობს და გვინდოდა ამ კვირაში სრულად გამოგვეკვლია ეს 7 ათასი მოსახლე. გვაქვს გათვლა, რომ ალბათ ინფიცირებული იქნება მოსახლეობის 5-დან 7-10 პროცენტამდე, უნდა მოხდეს მათი დროულად იზოლაცია, სამკურნალოდ გადაყვანა. ამ სოფლების მოსახლეობა მუშაობს გარდაბნის, ლილოს, თბილისის სხვადასხვა ბაზრობაზე, ამიტომ მაღალია ინფექციის გატანის რისკი. სამწუხაროდ, მოსახლეობიდან შემხვედრი ნაბიჯები არ იდგმება. გუშინ ჩვენი 6 ბრიგადა მუშაობდა ადგილზე, მიუხედავად ამისა, 350 ნიმუშზე მეტი ვერ ავიღეთ, როცა 6 ბრიგადის საშუალო სიმძლავრე არის 700-დან 1000 ნიმუშამდე.
იქ ინფექცია სერიოზულად ტრიალებს და აქედან მოვუწოდებ მოსახლეობას, რომ იყოს მეტი თანამშრომლობა მედპერსონალთან, ჩვენ გვინდა დროულად გამოვავლინოთ იქ ინფექცია, დროულად ჩავაქროთ ეს ცხელი წერტილი გაჩიანის დასახლებაში,“ – განაცხადა ამირან გამყრელიძემ.
მან ასევე აღნიშნა, რომ თუ ამ სოფლების მოსახლეობა არ მისცემს მათ ფართომასშტაბიანი კვლევის წარმოების შესაძლებლობას, რჩება ერთადერთი ნაბიჯი – ამ სოფლების ჩაკეტვა.
ამირან გამყრელიძემ ასევე აღნიშნა, რომ ბოლო დღეებში საქართველოში კორონავირუსის დადასტურებული შემთხვევების ზრდა პროგნოზირებადი იყო.
„პირდაპირ გეტყვით, პანიკის საფუძველი არ არის, ეს გარკვეულად პროგნოზირებადი იყო, შემსუბუქების შემთხვევაში მოსალოდნელია, რომ შემთხვევათა რაოდენობამ მოიმატოს, მთავარია, რომ ეს იყოს კონტროლირებადი, დღეს ეს პროცესი ქვეყანაში არის სრულად მართვადი.
მოსახლოებას პანიკის საფუძველი არა აქვს, მაგრამ ხაზს ვუსვამ, ჩვენთან მოსახლეოებაში მოდუნდა ყურადღება, შეიქმნა ილუზია, რომ ჩვენ უკვე დავამარცხეთ კორონავირუსი. არა, ბატონო. კორონავირუსული პანდემიის დამარცხება მოხდება მხოლოდ ერთიანად, გლობალურად, ეს ვერ მოხდება ცალ-ცალკე ქვეყნებში, კორონავირუსი არის ჩვენთან ერთად და ჩვენ ვცხოვრობთ მასთან მასთან ერთად,“ – განაცხადა ამირან გამყრელიძემ.
დღეის მდგომარეობით საქართველოში კორონავირუსის 1079 შემთხვევაა დადასტურებული, რომელთაგან გამოჯანმრთელდა 907, გარდაიცვალა 16 პაციენტი.
