ნეტგაზეთი • RU

პირბადეს ვერ შეველევით, არ იქნება ასე – გავიღვიძებთ ხვალ და აღარ გვექნება პანდემია – გამყრელიძე

15 თებერვლის მონაცემებით, საქართველოში დაახლოებით 170 000 ადამიანია ერთდროულად ინფიცირებული კორონავირუსით. ამის შესახებ დღეს, 15 თებერვალს, განაცხადა დაავადებათა კონტროლისა და საზოგადოებრივი ჯანდაცვის ცენტრის დირექტორმა, ამირან გამყრელიძემ.

„ძალიან ნელი ტემპით, მაგრამ სიტუაცია მიდის დამშვიდებისკენ, მაგრამ ამან არ უნდა გაგვათამამოს, რადგან შემთხვევების რაოდენობა ბევრია, ადამიანები ინფიცირდებიან და შესაბამისად, განსაკუთრებით მოწყვლად ფენებში – იქ, სადაც არის თანმხლები ქრონიკული დაავადებები, ასაკი – 50-60 წლის ზემოთ, გვაქვს გართულებები და ფატალური გამოსავლები.

ჰოსპიტლებში დღეს მწოლიარე 6000 პაციენტიდან დაახლოებით 95 პროცენტი გახლავთ აუცრელი. რეანიმაციებში მყოფი პაციენტებიდან ძალიან მაღალი პროცენტი გახლავთ აუცრელი.

აცრა და განსაკუთრებით ბუსტერი, დღეს, ომიკრონთან მიმართებაში, იცავს ადამიანს გართულებისგან, რაც იწვევს ჰოსპიტალიზაციას, მოხვედრას ინტენსიურ თერაპიაში, მოხვედრას რეანიმაციაში და ფატალურ გამოსავალს“ – განაცხადა ამირან გამყრელიძემ საკოორდინაციო საბჭოს ბრიფინგზე.

მან ხაზი გაუსვა, რომ კვლავ ორი მთავარი იარაღი რჩება პანდემიასთან საბრძოლველად – პირბადე და აცრა.

„პირბადეს ჩვენ ვერ შეველევით და ეს უნდა გახდეს ჩვენი ცხოვრების მთავარი წესი.

ომიკრონი და კორონავირუსული ინფექცია არ მორჩება, ვთქვათ, ერთ დღეს, არ იქნება, გავიღვიძებთ ხვალ და უცბად აღარა გვაქვს პანდემია. ის უნდა მინელდეს ნელ-ნელა და დიდი ალბათობით, შეიძლება გადაიქცეს ენდემურ, სეზონურ ინფექციად. ვნახოთ, უნდა დავაკვირდეთ და უნდა ვიყოთ ფრთხილად“ – აღნიშნა მან.

 

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com