„მე აწი ვეღარ გადავკეთდები“, – ამბობს „ბათუმელებთან“ ანზორ ბოლქვაძე. ის ისევ და ამჯერად უკვე მეოთხედ პარლამენტის წევრობას აპირებს. ეს ფრაზა ანზორ ბოლქვაძემ მაშინ გვითხრა, როცა მუშაობის სტილზე ვკითხეთ – ხულოს, შუახევის და ქედის გარდა, ამჯერად დეპუტატობის კანდიდატმა ხელვაჩაურში მცხოვრებ ამომრჩეველთანაც უნდა იმუშაოს. ანზორ ბოლქვაძე პარლამენტის წევრია 2008 წლიდან. „ქართულმა ოცნებამ“ ის დეპუტატობის კანდიდატად 20 ივლისსაც დაასახელა.
ანზორ ბოლქვაძის კანდიდატად დასახელებას დიდი გამოხმაურება მოჰყვა. დეპუტატობის კანდიდატს ესეც ვკითხეთ, ეცნობა თუ არა ფეისბუქპოსტებს და როგორია მისი რეაქცია.
- ბატონო ანზორ, თქვენ უკვე მეოთხედ აპირებთ პარლამენტში შესვლას. გვსმენია, რომ აღარ გინდოდათ დეპუტატობა, ასეა?
პირველ რიგში, რა თქმა უნდა, ამდენი წელია ვმოღვაწეობ და ეს არის დამოკიდებული მოსახლეობაზე. მოსახლეობა თუ მაგის საშუალებას არ მოგცემს, უარს იტყვი. ეს ყველაფერი არის მოსახლეობაზე დაყრდნობით და არა ის, რომ ვიღაცას ყაიდა გაუწიო და პარლამენტში შეხვიდე… მეც არ მითქვამს უარი, შეჩვეული ჭირი მირჩევნია, თუკი გამოდის, რომ ხალხს ეს უნდა, რომ მე დავიცვა მათი უფლებები, რატომაც არა.
- რატომაა „შეჩვეული ჭირი“ პარლამენტარობა?
ჩემი ახლა სხვა თემების დაწყება და ბიზნესში წასვლა გამორიცხულია. მირჩევნია, მოვემსახურები ხალხს და ჩემს ხარვეზებს, რომელიც მქონდა, ბოლომდე დავასრულებ.
- რა ხარვეზები გქონდათ?
მაგალითად, ხიხაძირის ხეობას დავპირდი გზა, უნდა დავასრულო ბოლომდე ეს; გოდერძი-ხულო-ადიგენისს გზის მშენებლობა, უფლის ძალით, სექტემბრიდან სრული ძალით დაიწყება, გოდერძის სათხილამურო ბაზის მშენებლობა… კარგს კაცი არ კითხულობს, მხოლოდ კვანტი როგორ დაგიდონ, იმას ფიქრობენ. ამისთვისაა ზოგი დაბადებული.
შემდგომ ამისა, მინდა ბოლომდე მივიყვანო მთებში მიწის ნაკვეთების საკუთრებაში გადაცემა, სადაც პირუტყვი გადაჰყავს მოსახლეობას. საუბარია 500 კვადრატულამდე მიწების დაკანონებაზე. ასე უფრო განვითარდება მთა, ტურისტებსაც მიიღებენ. წელს ამ ეპიდემიამ და გაჭირვებამ გვანახა, რომ მთლიანად აჭარაში, როცა დავდიოდი, გამოკეტილი სახლი აღარ იყო. ეს მისცემს მაგალითს ყველას, რომ ვინც ქალაქში ცხოვრობს, იმედია, ხელშეწყობა იქნება მთავრობისგანაც, რომ ყველა სახლი ამოქმედდეს. ასეთი ეპიდემიის პირობებში, ღმერთმა მეტი აღარ გაამეოროს, მაგრამ როცა ბოსტანი გექნება, კარტოფილს მოიყვან, პროდუქტი ასე აღარ გაძვირდება.
- რატომ გადაწყვიტეთ პარლამენტარობა, როგორ დაიწყო თქვენი პოლიტიკური კარიერა?
ეს ახლა 12 წლის წინანდელ ამბავს მეკითხებით, ხო? მაშინ, რა თქმა უნდა, სხვა თემით ვიყავ უფრო დაინტერესებული. მაშინ მაინცადამაინც პოლიტიკაზე არ მიფიქრია, მაგრამ ხალხთან ურთიერთობის გამო გავხდი პარლამენტარი. ვმუშაობდი, სახელმწიფო სამსახურს მივანებე თავი და კომპანია მქონდა, 150 დასაქმებული მყავდა, ვმუშაობდი სხვადასხვა რეგიონში, მშენებელი კაცი ვიყავი, სხვა სად ვიქნებოდი? მაშინ გაჩნდა ეგ აზრი, რომ უნდა წავსულიყავი პოლიტიკაში. იყო მაშინაც მთავრობა და ასე გადაწყვიტეს.
- ანუ მაშინდელმა მთავრობამ მიიღო ეს გადაწყვეტილება. თქვენ რის გამო გაგიჩნდათ მაშინ პარლამენტში შესვლის სურვილი?
ახალზე მელაპარაკეთ. დავამთავრე უკვე ძველი. ორმოცი რომ გავა, ყველაფერს მოიტირებ და საფლავს ქვას დაადებ. ვილაპარაკოთ ახალზე.
- ანუ პოლიტიკური წარსულის გახსენება აღარ გსურთ… ფეისბუქრეაქციები გვითხარით, როცა ცნობილი გახდა, რომ თქვენ ისევ დეპუტატობას აპირებთ, ბევრმა გაგაკრიტიკათ. თუ ეცნობით ამ ფეისბუქპოსტებს?
პოლიტიკოსმა ამას უნდა გაუძლოს, ჩემზე დიდი ბრძოლა იყო „ნაციონალური მოძრაობიდანაც“, რომ მე კანდიდატი არ ვყოფილიყავ. ბევრი დაქირავებული ჰყავთ, ისეთი რაღაცები შემთათხნეს, ეგონათ ანზორ ბოლქვაძეს ნერვი აეშლებოდა, ზოგი ქვებს გამოისვრის… მე არ ვნერვიულობ, მთავარია, უფალთან ვიყო მართალი. ის, რაც დაასახელეს, მაგალითად, თემურ ქედელიძე, ომარ ბოლქვაძე, თურმე მათ ტენდერებში ჩავრეულვარ, თქვენ შეგიძლიათ ეს გადაამოწმოთ, ეს პრინციპი თქვენ გაგაჩნიათ, შეამოწმეთ, რომ ამ ორგანიზაციას რა პრობლემები აქვს, სასამართლოში დგას საკითხი და მე ვითომ ვმფარველობ. ეს იყო მორიგი მიზეზი, რომ რაღაც თემების გამო დავბლოკილიყავ.
ერთი და იგივე ხალხი მუშაობს ამაზე, ეგენი მე არც მაინტერესებს, არც ვკითხულობ მაგენის კომენტარებს და პოსტებს, არც პასუხს ვცემ. ერთი ეს ვიცი, რომ ჩატარდება არჩევნები უფლის ძალით და მე იმედი ყოველთვის მაქვს – იმედი ჩემი ხალხის, საზოგადოების და იქ ვინც არ უნდა დამიპირისპირონ, თუ ხალხი გვერდზე გიდგას, მაგ დროს მათი წერა-კითხვა პირიქით მაპიარებს, მადლობას ვუხდი შორი-ახლოდან. თქვენ დაწერთ ახლა ამას და გაიგებენ, რომ მადლობას ვუხდი. რაში მჭირდება მე, რაღაცას ჩხრიკნიან, რატომ უნდა გავეცნო. მაგას მირჩევნია, წავიდე და გაჭირვებულს დავეხმარო – გასულ წელს 25 ოჯახს სახლი დაეწვა, იმათთვის სახლები ვეძებო. მაგათთვის მე დღეს არ დავაღამებ და არც პასუხს მოვთხოვ.
- ამბობთ, რომ მოქალაქეებს ცალ-ცალკე ხვდებით, როცა მათ პრობლემები აქვთ. ახლა სამაჟორიტარო ოლქი ფართოვდება და ხულოს, შუახევს და ქედას ხელვაჩაურიც დაემატა. როგორ აპირებთ მუშაობას?
მე აწი ვეღარ გადავკეთდები… ხელვაჩაურშიც მყავს მეგობრები. რა თქმა უნდა, მუშაობა უნდა, გასვლა, წინასწარ რამეს არ დავიტრაბახებ, იქნება საერთო ენა გამონახული. შეხვედრები მექნება ოქტომბრამდე, ჩემს ავტორიტეტს გამოვიყენებ, რაც გამაჩნია და მაქვს. ვიმუშავებ, არაა პრობლემა. გავაგრძელებ მუშაობას, როგორც წესი და რიგია.
- რა ვერ მოასწარით ამ 4 წელიწადში, როცა პარლამენტის წევრი იყავით?
ყველაზე რთული თემა არმოსწრებისა არის გოდერძის გზა. ყველა ღონე ვიხმარე და უფლის ძალით ეს თემა წამოწეულია ახლა მაღალ დონეზე და ერთი ეტაპი დაიწყეს. სულ მალე დაიწყება მეორე ეტაპი, მშენებლები შემობრძანდებიან, მე მგონი, ტენდერი დასრულდა.
- ამ პროცესის გაჭიანურება აჩვენებს თუ არა იმას, რომ მენეჯმენტი არის პრობლემა? რამდენიმე დღის წინაც იყო ამ გზის გამო საპროტესტო აქცია ხულოში.
მეც ვიყავი მაგ აქციაზე, შევხდი მოსახლეობას, მინისტრიც იყო ჩამობრძანებული თბილისიდან, შევახვედრე. ალბათ, მე იქ არ ვმფარველობდი და… სულ იმას იძახიან, ანზორ ბოლქვაძე მფარველობსო. რეალურად შევიდა სუსტი კომპანია, ჰქონდა სხვადასხვა დავალიანება, ვერ გააკეთა საბანკო გარანტია. სხვა თემა არ არსებობდა. მშენებლებს მეც შევხდი, ერთ კვირაში იქნება, 10 დღეში იქნება, გაიძახოდნენ, ჰოდა, ვერ მოაბეს თავი სატენდერო წინადადებას, რასაც კანონი მოითხოვს, მეტი არაფერი. მე ამ თემაში ჩავერთე, რომ ეს კომპანია როცა გადიოდა, მოსახლეობის ვალი არ დარჩენოდა, ადამიანებმა აიღეს ხელფასები, რაც იყო.
- რა შეძელით ამ მოწვევის პარლამენტში, როგორც კანონმდებელმა?
შეიძლება მე ის პოლიტიკოსი არ ვიყო, რომელიც ყოველდღიურად კანონპროექტებს წერდეს… კმაყოფილი ვარ მთის კანონით, შეწყალებების თემები იყო, ვალების ჩამოწერა, იყო კანონპროექტები, რომლითაც მოსახლეობა დღემდე სარგებლობს. ჩემთვის საამაყოა ისიც, რომ მთაში 100 ლარით ზედმეტ პენსიას იღებენ, თორემ უფრო მეტად დაიცლებოდა მთა.
- თქვენ საკონსტიტუციო ცვლილებებს თავდაპირველად არ დაუჭირეთ მხარი. ახლაც იგივე პოზიცია გაქვთ?
კი, მე ხელი არ მოვაწერე. ჩემმა მოსახლეობამ რაც მიკარნახა, ის გავაკეთე. მე ვიქნებოდი თუ არა, ერთი მაჟორიტარი აჭარას უნდა ჰყოლოდა და ეს შენარჩუნდა. აუცილებლობა იყო თუ არა, ამას დრო აჩვენებს. მეორე შემთხვევაში, როცა 120/30-ზე გაკეთდა, მივეცი ხმა. თავის დროზე მე არ მქონდა თანხმობა მოსახლეობისგან და არც ხმა არ მიმიცია, ეს არავის დავალება არ ყოფილა. როცა საკონსტიტუციო ცვლილებები ტარდებოდა, მოსახლეობამ დასვა საკითხი, რომ ჩვენ მაჟორიტარული სისტემა უნდა შევინარჩუნოთ.
- „საერთაშორისო გამჭვირვალობა საქართველოს“ მონაცემებით, რაც მარტში გასაჯაროვდა, თქვენ არასწორად გქონდათ შევსებული ქონებრივი დეკლარაცია. გაასწორეთ ეს დეკლარაცია?
არაფერი არ მიყიდია, არ გამიყიდია და შესწორება ახლა ხომ სუფთა წერა არ იყო, რომ გადამეწერა და ნიშანი დაეწერათ? დეკლარაციაში ერთადერთი იყო „ფონი პლიუსის“ ამბავი და ახლაც ვამბობ: ეს არის შპს-ს ქონება. იყო ასევე გოდერძის თემაზე საუბარი, თითქოსდა მე ვერტმფრენები მყოლია… არა, დეკლარაციაში არაფერი შემიცვლია.
