Batumelebi | „ტყვიას ნუ მესვრიან ახლა და დამსაჯონ“ – ანზორ ბოლქვაძე დეკლარაციაში ქონების დამალვაზე „ტყვიას ნუ მესვრიან ახლა და დამსაჯონ“ – ანზორ ბოლქვაძე დეკლარაციაში ქონების დამალვაზე – Batumelebi

„ტყვიას ნუ მესვრიან ახლა და დამსაჯონ“ – ანზორ ბოლქვაძე დეკლარაციაში ქონების დამალვაზე

„გამომრჩა, ალბათ, დეკლარაციის შევსების დროს…“ – ასე ხსნის პარლამენტის წევრი, ანზორ ბოლქვაძე, თავის ქონებრივ დეკლარაციაში აღმოჩენილ დარღვევებს, რაზეც დღეს, 2 მარტს, კვლევის შედეგი „საერთაშორისო გამჭვირვალობა საქართველომ“ გაავრცელა. დეკლარაციაში ქონებისა და სამეწარმეო საქმიანობის არასრულად მითითება კანონდარღვევაა.

ანზორ ბოლქვაძე განმარტავს, რომ ბინები ახალშეძენილი არ არის და დეკლარაციის შევსების დროს უძრავი ქონების შესახებ ინფორმაციის დაფიქსირება ამიტომ გამორჩა. ოთხი საცხოვრებელი ბინიდან ორი დეპუტატის მეუღლეს აჩუქეს.

„ვინ აჩუქებდა ახლა. მამაჩემის იყო ეს ბინები, მერე დედის გახდა და ასე აჩუქეს… რატომ გაგიკვირდათ, რა მოხდა?“ – გვკითხა დეპუტატმა.

ანზორ ბოლქვაძე არ ეთანხმება „გამჭვირვალობა საქართველოს“ კვლევის ნაწილს სამეწარმეო საქმიანობის შესახებ. კვლევის მიხედვით, ანზორ ბოლქვაძე 2017 წლიდან რეგისტრირებული შპს „გოდერძი დეველოპმენტის“ 50-პროცენტიანი წილის მფლობელია და დეპუტატს წილის მართვა სხვა პირისთვის მინდობით არ გადაუცია.

„ხვალ დასვენების დღეა და ზეგ მე წარმოგიდგენთ წერილობით ამის შესახებ ინფორმაციას, ამონაწერებს მოვიტან, რომ არც მეწილე ვარ მაგისა და არც არაფერი მიმიღია… უნდა გახსნილიყო გოდერძი, ჩამოვიდნენ, მერე მიწის ნაკვეთზე ვერ შეთანხმდნენ, მინდოდა ხელი შემეწყო. უმოქმედოა საერთოდ ეს ფირმა,“ – ამბობს ანზორ ბოლქვაძე.

პარლამენტარი ასევე არ ეთანხმება „საერთაშორისო გამჭვირვალობას“ კომპანია „აისი გოდერძის“ ნაწილში. ამ კომპანიას 2019 წლიდან თინა ბოლქვაძე ფლობს – ანზორ ბოლქვაძის მეუღლე, მანამდე კი, კომპანიის წილი დეპუტატის შვილს – ნოდარ ბოლქვაძეს ეკუთვნოდა. დეპუტატი მიიჩნევს, რომ ეს ინფორმაცია 2019 წლის დეკლარაციაში არ უნდა შეეტანა და ახალში შეიტანს.

„ახალ დეკლარაციაში იქნება ეს… რაც შეეხება ჩემი შვილის წილებს და სამეწარმეო საქმიანობას, ამას მე რატომ შევიტანდი? ჩემი შვილი ცალკე ცხოვრობს, მისი ცხოვრება აქვს, დამოუკიდებლად ცხოვრობს და სრულწლოვანია. ის ჩემს დეკლარაციაში საიდან მოხვდებოდა?“ – კითხულობს დეპუტატი.

ანზორ ბოლქვაძე ასევე ფიქრობს, რომ დეკლარაციაში ვერ მოხვდებოდა ხულოში მისი ცოლის კუთვნილი სასტუმროს ფართობის გაქირავებიდან მიღებული შემოსავალი.

„დივიდენდი არ აუღია ჩემს მეუღლეს და რას ასახავდა? მიქირავებულია სამი ოთახი და იხდის კომუნალურ გადასახადებს, ასევე ხელფასს,“ – გვითხრა ანზორ ბოლქვაძემ. მან დაგვიკონკრეტა, რომ ქირის საფასური ყოველთვიურად 1000 ამერიკული დოლარია. ანზორ ბოლქვაძის მტკიცებით, ეს ფული კომუნალური ხარჯების დაფარვას სჭირდება, ასევე დამლაგებლის და კიდევ რამდენიმე დამხმარე პირის ხელფასს.

როგორ უნდა დაისაჯოს დეპუტატი დეკლარაციის არასრულად შევსებისთვის?

„კანონი არსებობს და დამსჯიან, ალბათ. ტყვიას ნუ მესვრიან ახლა და დამსაჯონ, ფული არაა დამალული არც ერთი თეთრი,“ – გვიპასუხა ანზორ ბოლქვაძემ.

ნეტგაზეთის მასალების სხვა გამოცემებში გადაბეჭდვის წესი
ავტორი