Batumelebi | აჭარის მთავრობა ქობულეთში, ზღვასთან ახლოს, შენობას და მიწის ნაკვეთს ყიდის აჭარის მთავრობა ქობულეთში, ზღვასთან ახლოს, შენობას და მიწის ნაკვეთს ყიდის – Batumelebi

აჭარის მთავრობა ქობულეთში, ზღვასთან ახლოს, შენობას და მიწის ნაკვეთს ყიდის

აჭარის ფინანსთა და ეკონომიკის სამინისტრო ქობულეთში, ზღვასთან ახლოს,  მიწის ნაკვეთს და მასზე დამაგრებულ ორსართულიან შენობას სასტუმროს ან საზოგადოებრივი ობიექტის მოწყობის პირობით ყიდის.

ქონების საწყისი ფასი 820 000 ლარია. ამ ნაკვეთისა და შენობის პრივატიზებასთან დაკავშირებით ქობულეთის მერიის მიერ აჭარის ფინანსთა და ეკონომიკის სამინისტროში გაგზავნილი წერილის შინაარსის მიხედვით ამ  შენობაში დაინტერესებულ პირს სარესტორნო კომპლექსის მოწყობა სურს და მერიაში მისი გასხვისება სწორედ ამ პირობით განიხილეს.

907 კვადრატული მეტრი მიწის ნაკვეთი და მასზე დამაგრებული ორსართულიანი შენობა [ 892 კვ.მ]  ქობულეთში, აღმაშენებლის გამზირზე N110-ში მდებარეობს და ზღვის სანაპიროსთან ახლოსაა.

 

აუქციონის პირობის მიხედვით, მყიდველმა ხელშეკრულების გაფორმებიდან არაუგვიანეს 36 თვის ვადაში საკუთრებაში გადაცემულ მიწის ნაკვეთზე განთავსებული შენობა-ნაგებობის სარემონტო-სარეკონსტრუქციო სამუშაოები უნდა დაასრულოს.

შენობის სარეაბილიტაციო სამუშაოების დასრულების შემდეგ კი მყიდველს შეუძლია შენობაში მოაწყოს სასტუმრო ან საზოგადოებრივი ობიექტი, იმ პირობით, რომ შენობაში არ შეიძლება იყოს საცხოვრებელი აპარტამენტი ან ბინა.

სასტუმროს ან საზოგადოებრივი ობიექტის პროფილი შენობას მინიმუმ 10 წლის ვადით უნდა შეუნარჩუნდეს.  მყიდველმა უნდა აიღოს ასევე ამ ადგილზე  500 000 ლარის ინვესტიციის განხორციელების ვალდებულება.

ნეტგაზეთის მასალების სხვა გამოცემებში გადაბეჭდვის წესი
ავტორი