Batumelebi | ახალი რესპუბლიკურისთვის 2,2 მილიონის აპარატურას სამინისტრო უტენდეროდ შეიძენს ახალი რესპუბლიკურისთვის 2,2 მილიონის აპარატურას სამინისტრო უტენდეროდ შეიძენს – Batumelebi

ახალი რესპუბლიკურისთვის 2,2 მილიონის აპარატურას სამინისტრო უტენდეროდ შეიძენს

აჭარის ჯანდაცვის სამინისტრო ახალი „რესპუბლიკური“ კლინიკისთვის სამედიცინო აპარატურას და ინვენტარს შეიძენს. ამჯერად დაგეგმილია 2 მილიონ 200 ათასამდე ლარის ღირებულების აპარატურის შესყიდვა ტენდერის გარეშე. სამინისტრომ შესაბამისი თანხმობის მისაღებად სახელმწიფო შესყიდვების სააგენტოს უკვე მიმართა.

სამინისტრო გეგმავს შეიძინოს:

  • ლაპარასკოპიული სისტემა 4K – 1 ცალი;
  • ინტეგრირებული საოპერაციოს ლაპარასკოპიული სისტემა 3D – 1 ცალი;
  • ენდოსკოპიური სისტემა – 1 ცალი;
  • ეოპის რენტგენი, C-Arm – 1 ცალი;
  • ინტრაოპერაციული ექოსკოპი 1 ცალი;
  • საოპერაციო მაგიდა – 1 ცალი;
  • საოპეარციო სანათი – 1 ცალი;
  • ანესთეზიის აპარატი – 1 ცალი;
  • საოპერაციო მაგიდა – 2 ცალი;
  • საოპეარციო სანათი – 2 ცალი;
  • ანესთეზიის აპარატი – 2 ცალი.

ჯანდაცვის სამინისტროს დაგეგმილი აქვს, რომ შესყიდვა/მოწოდება მოხდება ხელშეკრულების გაფორმებიდან არაუგვიანეს 50 დღეში [ხელშეკრულება კი გაფორმდება აჭარის მთავრობის შესაბამისი განკარგულების გამოსვლიდან არაუგვიანეს მომდევნო 2 სამუშაო დღეში].

2020 წლის 22 აპრილს, საქართველოს მთავრობის გადაწყვეტილებით, აჭარის მთავრობას ეთხოვა შპს „ქ. ბათუმის რესპუბლიკური კლინიკური საავადმყოფოს“ სარგებლობაში გადასცეს კლინიკის ახალი შენობა, რომელიც აჭარის მთავრობის საკუთრებაა. ამ კლინიკაში მანამდე ცხელების ცენტრი ამოქმედდა.

30 აპრილს კი, აჭარის 2020 წლის ბიუჯეტში შეტანილი ცვლილებით, 8 855 000 ლარით დაფინანსდა „ქალაქ ბათუმის 170 საწოლზე გათვლილი მრავალპროფილური კლინიკური საავადმყოფოს აღჭურვა, ფუნქციონირება და რისკ ჯგუფების ინდივიდუალური დაცვის საშუალებებით უზრუნველყოფის პროგრამა“.

სწორედ ამ პროგრამის ფარგლებში შეისყიდის აჭარის ჯანდაცვის სამინისტრო ზემოთ აღნიშნულ აპარატურას და ინვენტარს.

ამ თემაზე: 

ახალი რესპუბლიკურისთვის 8,8 მილიონი გამოიყოფა აჭარის ბიუჯეტიდან

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com