ბათუმში, რუსთაველის ქუჩაზე, დელფინარიუმის მიმდებარე ტერიტორიიდან შერიფ ხიმშიაშვილის ქუჩამდე [არდაგანის ტბა] გზის სავალი ნაწილის აღსადგენად, 174 557 ლარი ტენდერის გარეშე დაიხარჯება. მერიის საქალაქო ინფრასტრუქტურისა და კეთილმოწყობის სამსახურის მიერ ორჯერ [მარტსა და მაისში] გამოცხადებული ტენდერები არ შედგა.
გზის აღნიშნულ მონაკვეთში, „მუნიციპალური ინფრასტრუქტურის რეაბილიტაციის პროექტის ფარგლებში“ სანიაღვრე და საკანალიზაციო სამუშაოები ჩატარდა, რის გამოც აყარეს ქვაფენილი და გადათხარეს გზის სავალი ნაწილი. გზა არსებული ბუნებრივი ქვაფენილის გამოყენებით უნდა აღადგინონ.
„ტენდერის გამოცხადების თავისებურებიდან გამომდინარე, ხელშეკრულების დადებას სავარაუდოდ დასჭირდება 2 თვე, რაც, თავის მხრივ, გამოიწვევს სამუშაოების დასრულებას [იმ შემთხვევაში, თუ ტენდერი შედგა] იმ პერიოდისათვის, როცა აქტიური ტურისტული სეზონი დასრულებული იქნება. ცნობილია, რომ საქართველოს მთავრობის გადაწყვეტილებით იგეგმება 2020 წლის 15 ივლისიდან ბათუმში გაიხსნას საერთაშორისო ტურისტული სეზონი. თუ შეზღუდული ვადების საფუძვლით მოხდება ხელშეკრულების დადება, 15 ივლისისთვის, ტურისტული თვალთახედვით ცენტრალური მნიშვნელოვანი ადგილები იქნება ინფრასტრუქტურულად მოწესრიგებული, ხოლო აგვიტოს დასაწყისისთვის – ე.წ. „ახალი ბულვარის“ მიდამოებიც, რომელიც ასევე ტურისტულად მნიშვნელოვანი ზოლია“, – აღნიშნულია წერილში, რომლითაც მერიის სამსახურმა შესყიდვების სააგენტოს მიმართა.
რუსთველის ქუჩა
სააგენტომ კეთილმოწყობის სამსახურს ტენდერის გარეშე ხელშეკრულების გაფორმებაზე თანხმობა 5 ივნისს მისცა. მერიის სამსახურის ინფორმაციით, გზის ამ მონაკვეთის რეაბილიტაცია ხელშეკრულების დადებიდან 60 დღეში უნდა დასრულდეს.
ამ თემაზე:
როდის გაკეთდება რუსთაველის ქუჩა დელფინარიუმიდან არდაგანის ტბამდე
