ბათუმში, რუსთაველის ქუჩის რეაბილიტაცია, დელფინარიუმიდან არდაგანის ტბამდე მონაკვეთში, მიმდინარე წლის აგვისტოში უნდა დასრულდეს. ეს იმ შემთხვევაში, თუ ქუჩის ამ მონაკვეთის რეაბილიტაციაზე გამოცხადებული ტენდერი შედგება და სამუშაოები არსებული გეგმით ჩატარდება.
ტენდერი ბათუმის მერიის საქალაქო ინფრასტრუქტურისა და კეთილმოწყობის სამმართველომ 174 557 ლარით გამოაცხადა. წინადადებების მიღების ბოლო ვადა 27 მაისია, სამუშაოები კი გამარჯვებულთან ხელშეკრულების გაფორმებიდან 2 თვეში უნდა დასრულდეს.
გზის ამ მონაკვეთში ინფრასტრუქტურული სამუშაოები მიმდინარეობდა, რის გამოც მოშლილია გზის საფარი [ქვაფენილი], ტროტუარები და ბორდიურები. გზა ცალმხრივად ჩაკეტილია.
რუსთაველის ქუჩაზე დელფინარიუმის მიმდებარე ტერიტორიიდან შ. ხიმშიაშვილის ქუჩამდე [არდაგანის ტბა] გზის სავალი ნაწილის რეაბილიტაცია არსებული ბუნებრივი ქვაფენილის გამოყენებით უნდა მოხდეს.
ტენდერის პირობის მიხედვით ჩასატარებელი ძირითადი სამუშაოებია: საფუძვლის მოყვანა პროფილზე, ბეტონის დეკორატიული ფილის (არსებული, ადრე დემონტირებული) მოწყობა, საფარის მოწყობა გრანიტის ქვაფენილით [„ბრუსჩატკა“], ბუნებრივი გრანიტის ფილის მოწყობა; ბაზალტის ანაკრები ბორდიურების მოწყობა, დეკორატიული მოაჯირების მოწყობა.
რუსთაველის ქუჩის რეაბილიტაცია – სიტუაციური გეგმა / პროექტიდან
______________________________
მთავარ ფოტოზე: რუსთაველის ქუჩიდან აღებული ქვები, რითაც ისევ ქვაფენილი უნდა მოეწყოს.
