Batumelebi | პასუხები სკოლის არჩევასთან დაკავშირებულ კითხვებზე პასუხები სკოლის არჩევასთან დაკავშირებულ კითხვებზე – Batumelebi
RU | GE  

პასუხები სკოლის არჩევასთან დაკავშირებულ კითხვებზე

მოსწავლეების უმრავლესობამ სასწავლო წელი დაასრულა, თუმცა მშობლები უკვე იწყებენ მომავალი წლისთვის მზადებას, განსაკუთრებით თუ ბავშვი პირველ კლასში მიდის და ცხოვრების ახალი ეტაპი უნდა დაიწყოს. ხშირად გაგიგიათ ალბათ მშობლების კითხვები: რომელ სკოლას მირჩევთ? როგორ შევაფასო სწავლის ხარისხი? როგორი გარემო დახვდება? როგორი კლასელები ეყოლება? მასწავლებლები ვინ არიან? რა საგნებს გაივლის, რა გამოადგება ცხოვრებაში? ამ კითხვებზე პასუხის მისაღებად გთავაზობთ ინტერვიუს ქართულ-ამერიკული სკოლა “პროგრესის” ბათუმის ფილიალის დირექტორ ნანა ჩარექიშვილთან, რომელიც დეტალურად ისაუბრებს მასწავლებლების შერჩევის კრიტერიუმებზე და ბავშვის წარმატებისთვის აუცილებელ საგნებზე.

  • ქალბატონო ნანა, რა სერვისებს სთავაზობს სკოლა ბათუმელ ბავშვებს?

ჩვენი სკოლა უკვე წლებია წარმატებულად ფუნქციონირებს ბათუმში, ქუთაისსა და თბილისში და ორიენტირებულია ხარისხიან სწავლა-სწავლებაზე. სკოლაში სწავლება ორიენტირებულია მოსწავლის წარმატებაზე და თანამედროვე ცხოვრების რეალური გამოწვევების დაძლევაზე. სწავლების კურიკულუმი ეფუძნება ეროვნულ და ამერიკულ მოდულს. დატვირთულია სამეცნიერო, STEM და სპორტული აქტივობით; მისი მიზანია განათლებული, სამართლიანი და პასუხისმგებლიანი თაობის აღზრდა.

ჩვენთან მოქმედებს სკოლამდელი, დაწყებითი, საშუალო და უმაღლესი საფეხურები, მათ შორის ამერიკული აკადემია. ასევე გვაქვს მოსამზადებელი კურსები TOEFL, IELTS, SAT გამოცდებისთვის.

  • როგორ არჩევთ მასწავლებლებს, რა კრიტერიუმებით აფასებთ?

პედაგოგთა შერჩევის პროცესი ძალიან საპასუხისმგებლოა. საკვალიფიკაციო მოთხოვნების გარდა საჭიროა თვისებები, რომლებიც მნიშვნელოვნად განაპირობებს კანდიდატის დასაქმებას, როგორიცაა: პასუხისმგებლობის გრძნობა, საქმის სიყვარული და ერთგულება. მასწავლებელს გაცნობიერებული უნდა ჰქონდეს მომავალი საქმიანობის მნიშვნელობა – უყვარდეს ბავშვი. მინდა აღვნიშნო, რომ ამჟამად ჩვენი სკოლის გუნდი დაკომპლექტებულია მაღალკვალიფიციური კადრებით, რომელთა შენარჩუნებაც ჩვენი ყოველდღიური საზრუნავია.

  • როგორ ინარჩუნებთ ხარისხს, მუდმივი მონიტორინგი თუ გაქვთ?

სასწავლო პროცესის დაგეგმვის და ორგანიზების პარალელურად მნიშვნელოვანია შენარჩუნება და განვითარება, შეფასება, სამომავლო ნაბიჯების დაგეგმვა და შედეგზე გასვლა. ჩვენი პრიორიტეტია მოსწავლეზე ორიენტირებული სასწავლო გარემოს შექმნა, რისთვისაც სისტემატიურად ვაწარმოებთ მონიტორინგს. ახლაც, დისტანციურ რეჟიმში სწავლებისას, პედაგოგებთან ერთად განვიხილავთ მონიტორინგის შედეგებს და ვგეგმავთ მომავალ აქტივობებს. ასევე მოსწავლის აკადემიურ მოსწრებას მშობლების ჩართულობაც განაპირობებენ, ამიტომაც მუდმივად გვაქვს მათთან კომუნიკაცია.

ნანა ჩარექიშვილი, სკოლა პროგრესის ბათუმის ფილიალის დირექტორი

  • რთული ქცევის ბავშვები თუ გყავთ სკოლაში, ცელქი ბავშვი ადრე რთულ ქცევის ბავშვად ითვლებოდა, რამდენად არის ეს დამოკიდებულება შეცვლილი?

ჩვენ ცელქი ბავშვებიც გვიყვარს და მშვიდებიც. თითოეული ბავშვი ძვირფასია და ინდივიდუალურ მიდგომას საჭიროებს. ჩვენი პედაგოგები და პირადად მეც ჩართული ვართ და ვმოქმედებთ იმ კუთხით, რაც ბავშვის საჭიროებას და ინტერესებს წაადგება.

  • საგანმანათლებლო მოდულში თუ გაქვთ ისეთი საგნები, რომლებიც სხვა სკოლებში ნაკლებადაა?

სკოლას აქვს ორმაგი აკრედიტაცია. მოსწავლეს ქალაქიდან გაუსვლელად შეუძლია მიიღოს ორენოვანი განათლება და ამერიკული დიპლომი. საგაკვეთილო პროცესს უძღვებიან, როგორც ქართველი, ასევე უცხოელი პედაგოგები. სკოლა გამოირჩევა უცხო ენების გაძლიერებული სწავლებით – რუსული, ინგლისური, გერმანული ენები. ინგლისურ ენას ეუფლებიან პირველი კლასიდან, ასევე ბავშვები სწავლობენ ბიზნეს უნარებს და უცხო გარემოში ადაპტაციას. მესამე კლასიდან ტექნიკური და საბუნებისმეტყველო საგნების სწავლება მიმდინარეობს ინგლისურ ენაზე.

მაღალ კლასებში მოსწავლეებს გაცვლით პროგრამებს, ასევე საერთაშორისო პროექტებსა და კონფერენციებში მონაწილეობას ვთავაზობთ. ჩვენთან სხვადასხვა უცხოენოვანი მოსწავლეებიც არიან. მათთან ერთად სწავლა მოსწავლეს უვითარებს მრავალფეროვან, მულტიკულტურულ გარემოში თანაარსებობის უნარებს.

  • არაფორმალური განათლების მისაცემად, რა აქტივობები გაქვთ სკოლაში?

სკოლა “პროგრესში” ფუნქციონირებს სხვადასხვა კლუბი, რომელთა მიზანია მოსწავლეთა მოტივაციის და ჩართულობის გაზრდა. ამ ეტაპზე სკოლაში ფუნქციონირებს ლიტერატურისა და კინო კლუბი “ქიმერიონი”, კითხვის კლუბი (ინგლისურ ენაზე), ეკო-კლუბი, ფილოსოფიის კლუბი. ამ კლუბებში სხვადასხვა ასაკის მოსწავლეები არიან გაწევრიანებულები და საკმაოდ მნიშვნელოვან პროექტებს ახორციელებენ. მაგალითად ეკო-კლუბი ჩართულია ნიკო კეცხოველის პრემიის კონკურსში; კლუბები ატარებენ ინტელექტუალურ თამაშებს. სკოლა მაქსიმალურად მხარს უჭერს მოსწავლეთა ინიციატივებს. არაფორმალური განათლება მნიშვნელოვან როლს ასრულებს მოსწავლეთა მრავალმხრივი უნარების განვითარებაში.

  • ხშირად ქვეყნდება თქვენმოსწავლეების შესახებ სტატიები, მოსწავლეების წარმოჩენა რა მიზანს ემსახურება?

ჩვენ თითოეული მოსწავლით ვამაყობთ, მართლა გამორჩეული ბავშვები გვყავს. სტატიების საშუალებით გარდა იმისა, რომ საზოგადოებას ვაცნობთ ჩვენი მოსწავლეების ხედვას, მოსაზრებებს, მისწრაფებებს, ასევე ვცდილობთ ხელი შევუწყოთ მათში თავისუფალი აზროვნების, გამოხატვის თავისუფლების დამკვიდრებას, თვითრწმენის ამაღლებას და განმტკიცებას. რა რა თქმა უნდა, თანამედროვე სამყაროში მედიასთან ურთიერთობაც მნიშვნელოვანი უნარია, რომელიც სკოლიდანვე უნდა გამოიმუშაონ.

  • ერთ-ერთი პირველი იყავით იმ სკოლებს შორის, რომლებიც ახალ ფორმატს დისტანციურ სწავლებას ადვილად მოერგო. რამდენად გაუჭირდათ მოსწავლეებს და მასწავლებლებს?

დისტანციურ სწავლებაზე გადასვლა მალევე დავგეგმეთ და განვახორციელეთ. ვფიქრობ, ჩვენმა სკოლამ ამ გამოწვევას კარგად გაართვა თავი. წინასწარ გაიწერა სასწავლო ბადე სკოლის ყველა საფეხურისთვის, შედგა საგაკვეთილო ცხრილი, მოხდა მასწავლებლების მობილიზება/გადამზადება და მშობლების ინფორმირება. მოსწავლეთა ნაწილი გასული იყო ქალაქგარეთ, ძირითადად მაღალმთიან მუნიციპალიტეტებში და ვინაიდან პროცესი საინფორმაციო, საკომუნიკაციო ტექნოლოგიებზეა დაფუძნებული, დავუკავშირდით მშობლებს, რომ მომხდარიყო თითოეული მოსწავლის პრობლემის იდენტიფიცირება და გამოსავლის გზის დასახვა. დისტანციური სწავლების პროცესის დაწყებიდან დღემდე ყველა მოსწავლე ჩართული იყო საგაკვეთილო პროცესში. მცირე გამონაკლისების შემთხვევაში, მასწავლებლები ინდივიდუალურად მუშაობდნენ ბავშვებთან.

დავალებების, ტესტირებების თუ სხვა აქტივობების ჩატარებისთვის პედაგოგები იყენებდნენ, როგორც სკოლის ელექტრო ჟურნალს, ასევე სხვა პლატფორმებს: zoom-ს, online-conference-ს, ტელე-სკოლას. მინდა ვისარგებლო შემთხვევით და ყველა პედაგოგს, დამრიგებელს და ტექნიკურ მენეჯერს მადლობა გადავუხადო გაწეული შრომისა და შეუფერხებლად, ხარისხიანად წარმართული პროცესისთვის. მადლობა მშობლებს თანადგომისა და მხარდაჭერისთვის.

  • თქვენი სკოლა ძლიერია STEM მიმართულებით, რამდენად არის ინტერესი მოსწავლეების მხრიდან, რა ღონისძიებები ტარდება?

სტემი – ტექნოლოგიების, ინჟინერიის, მათემატიკის და პროგრამირების კომბინირებული სასწავლო პროგრამაა, რომელიც ემსახურება საბუნებისმეტყველო საგნებით მოსწავლეების დაინტერესებას. ჩვენი მოსწავლეების უმრავლესობა ჩართულია stem აკადემიის პროგრამაში, რომელსაც 2020 წელს გამარჯვებული მასწავლებელი – უტა კილასონია უძღვება.

გასულ წელს სკოლა პროგრესმა გრანდიოზულ საგანმანათლებლო stem ფესტივალს უმასპინძლა, რომელსაც საქართველოს სხვადასხვა სკოლის მოსწავლეები ესწრებოდნენ. სკოლამ შეიძინა ვირტუალური ლაბორატორია, რომელიც პირდაპირ კავშირშია საბუნებისმეტყველო საგნების წარმატებულ სწავლებასთან. Stem ფესტივალზე ახალგაზრდებმა ამომწურავი ინფორმაცია მიიღეს ინოვაციური დანადგარების და ტექნოპარკში არსებული შესაძლებლობების შესახებ. ფესტივალს ესწრებოდა საქართველოს ინოვაციების და ტექნოლოგიების სააგენტოს ხელმძღვანელი ბატონი ავთანდილ კასრაძე. ბავშვებმა გამოფინეს თავიანთი პროექტები და ნამუშევრები. ახალგაზრდები კიდევ ერთხელ დარწმუნდნენ, რომ მეცნიერებაც სახალისო და საინტერესო შეიძლება იყოს.

ასევე აღვნიშნავ, რომ ჩვენი მოსწავლეები მეექვსე წელია ათასწლეულის გამოწვევის ფონდის მიერ ორგანიზებულ კონკურსში მონაწილეობენ. ფინალურ გუნდებს შორის არის გუნდი “ატომი”, რომლის ერთ-ერთი წევრია პროგრესელი ბექა ვანაძე. მალე გამოვლინდება გამარჯვებული გუნდი, რომელიც “ნასაში” გაემგზავრება. სკოლის ყველა პედაგოგი ვგულშემატკივრობთ ბავშვებს, უტა კილასონიას და ბატონ დავით სონღულაშვილის დამსახურებით დიდი წარმატებები ელოდებათ წინ.

  • რას ეტყოდით მშობლებს, რომლებიც სკოლას არჩევენ თავიანთი შვილებისთვის?

სკოლის შერჩევისას ყურადღება მიაქციონ პირველ რიგში მასწავლებლებს, ისინი არიან ნებისმიერი სკოლის უმთავრესი აქტივი, შემდეგ უკვე პროგრამას, რა საგნებს ისწავლის, რამდენად ჩართული იქნება არაფორმალურ აქტივობებში.

ბავშვი უნდა სწავლობდეს ჯანსაღ და უსაფრთხო გარემოში, ჰქონდეთ მეგობრული და თბილი ურთიერთობები, მიიღოს ხარისხიანი განათლება, რომელიც პასუხობს თანამედროვე გამოწვევებს. ამ ყოველივეს სკოლა  “პროგრესი” 4 წლიდან 18 წლამდე ასაკის მოსწავლეებს სთავაზობს. ეს არის ადგილი, სადაც ბავშვები თავს ბედნიერად, თავისუფლად და სრულფასოვნად გრძნობენ, მაღალკვალიფიციური პედაგოგები ენერგიას არ იშურებენ, რომ თითოეულ მოსწავლეს თითოეული საგანი შეაყვარონ. და კიდევ ერთს დავამატებ, დასავლეთ საქართველოში მხოლოდ ჩვენთან არის შესაძლებელი ქართულ ატესტატთან ერთად ამერიკული დიპლომის აღება ქალაქიდან გაუსვლელად.

პირველკლასელთა რეგისტრაციის ფორმა იხილეთ აქ:

სკოლა პროგრესის მოსწავლეები

ნეტგაზეთის მასალების სხვა გამოცემებში გადაბეჭდვის წესი
ავტორი