55 წლის მარი კო პირველი ტრანსგენდერი ქალია საფრანგეთში, რომელიც ჩრდილოეთით მდებარე ტილუა-ლე-მარშენის მერად აირჩიეს 15 მარტს გამართულ მუნიციპალურ არჩევნებზე. როგორც მარი კო ამბობს, ხმათა უმრავლესობა მან პატარა დასახლების განვითარების ხედვის გამო მოაგროვა, რაც სრულად იყო ასახული საარჩევნო პროგრამაში.
მარი კოს თქმით, ტილუა-ლე-მარშენი პატარა დასახლებაა, სადაც სოციალური ურთიერთობებიც კი გართულებულია. ახალი მერი პროფესიით ინჟინერია და სასოფლო სამეურნეო ტექნიკოსისა და მებაღის დიპლომი აქვს, უფრო კი მარი კო საკუთარ თავს სოფლის მეურნეობისა და ეკოლოგიის სფეროსთან დაკავშირებულ ბიზნესმენეჯერად მოიაზრებს.
მისი თქმით, ამ პატარა დასახლებისთვის მნიშვნელოვანია ეკოლოგიურად სუფთა გარემოს შენარჩუნება, სოფლის მეურნეობის განვითარება და ადგილობრივი ეკონომიკის განვითარების ხელშეწყობა.
მარი კო 20 წელია ცხოვრობს ტილუა-ლე-მარშენში და როგორც თავად ამბობს, ეს იშვიათი ადგილია, სადაც ის დისკრიმინაციის მსხვერპლი არ გამხდარა. „იშვიათია, როცა ადამიანები ასე კეთილები არიან, როგორც აქ, მიუხედავად რამდენიმე უხეში შეცდომისა,“ – ამბობს მარი კო.
მისი ოცნებაა ტილუა-ლე-მარშინი განვითარებულ დასახლებად აქციოს და აჩვენოს საზოგადოებას, რომ ამ დასახლების მცხოვრებლებს თავად შეუძლიათ აქციონ სოფელი ისეთად, როგორადაც ხელისუფლება მას ვერ აქცევდა.
