მახინჯაურში 23 მაისს დაკავებულ პოლიციელს წინასწარი პატიმრობა შეუფარდეს. აღკვეთი ღონისძიების შეფარდების პროცესი დღეს, 25 მაისს, გაიმართა თბილისის საქალაქო სასამართლოში.
პოლიციელი მამუკა დიასამიძეა, იგი პოლიციის მახინჯაურის განყოფილებაში უბნის ინსპექტორ-გამომძიებლად მუშაობდა. პოლიციელი შინაგან საქმეთა სამინისტროს გენერალური ინსპექციის თანამშრომლებმა გამოძალვის ფაქტზე დააკავეს.
„დააკავეს ოპერატიული ინფორმაციების საფუძველზე, ბრალდებული არ აღიარებს და არ ეთანხმება ბრალს, ჩვენ აღკვეთის ღონისძიებას გავასაჩივრებთ,“ – ამბობს ადვოკატი ზვიად მარკოიძე. ის ბრალდებულის გათავისუფლებას 20 ათასი ლარი გირაოს საფუძველზე ითხოვდა.
არც ადვოკატი და არც ბრალდების მხარე არ ასაჯაროვებენ ბრალის შესახებ დადგენილებას, სადაც კონკრეტულად იქნება გაწერილი, რას ედავებიან პოლიციელს. დისტანციურად ჩატარებული სასამართლო სხდომის შემდეგ ადვოკატმა ზვიად მარკოიძემ გვითხრა, რომ ბრალის მიხედვით არ ირკვევა, რის გამო ითხოვდა პოლიციელი ფულს და რამდენს.
ადვოკატის, ზვიად მარკოიძის ინფორმაციით, ბათუმში მცხოვრებ ქალს, რომელსაც ბრალდებული პოლიციელი შორიდან იცნობდა, ფეისბუქის ყალბი გვერდიდან მიუვიდა შეტყობინება, რომ ფული უნდა გადაეხადა.
„… თუ არადა, ცუდად იქნება შენი საქმეო. ამ ქალმა მიმართა პოლიციას დახმარებისთვის. გამოძიებამ დაადგინა, თუმცა არაფერი დადასტურებული არ არის, რომ ამ ყალბი ფეისბუქგვერდის უკან პოლიციელი იდგა. არ შეესაბამება რეალობას ის, რომ პირადი ცხოვრების გახმაურებას ჰქონდა ადგილი…“ – ამბობს ადვოკატი ზვიად მარკოიძე.
ბრალის დადასტურების შემთხვევაში, პოლიციელს ელოდება დაჯარიმება ან თავისუფლების აღკვეთა ვადით ორიდან ოთხ წლამდე.
