მუსლიმური სამყარო დღეს რამადან ბაირამს აღნიშნავს. ბაირამი აღნიშნეს ბათუმშიც. ტრადიციული ლოცვა დილის 6:31 საათზე დაიწყო. ბათუმის ორთა ჯამეში მრევლი დისტანციის დაცვით შეიკრიბა. დისტანცია იყო დაცული მეჩეთის გარეთ, ქუჩაში მლოცველებს შორისაც. ყველა მლოცველს ეკეთა პირბადე.
19 მარტის შემდეგ ეს პირველი შემთხვევაა როცა მუსლიმები სალოცავად შეიკრიბნენ. 24 მაისამდე მეჩეთები დაკეტილი იყო და იქ ლოცვა არ აღევლინებოდა.
„ბაირამი ეს არის ერთთვიანი მარხვის შედეგად მიღწეული სულიერი ამაღლების სიხარული. ბაირამი არის, სიყვარულის, სიხარულის, განაწყენებულთა შერიგების, ახლობლების, ნათესავების, ავადმყოფების მონახულების, ობლების, მიუსაფართა, ღარიბ-ღატაკთა გულების გახარების საზეიმო დღესასწაული. სრულიად მუსლიმ სამყაროს და საქართველოში მცხოვრებ მუსლიმებს მივულოცო რამადნის ეს დღესასწაული,“ – თქვა სრულიად საქართველოს მუფთმა ადამ შანთაძემ რამადანის ლოცვის დასრულების შემდეგ.
მან ასევე მადლობა გადაუხადა მუსლიმებს მოთმინებისათვის, რომელიც მათ გამოიჩინეს დაკეტილი მეჩეთების გამო.
„მინდა დიდი მადლობა გადავუხადო ჩვენს მრევლს, მუსლიმ საზოგადოებას, რომელმაც გამოიჩინა ძალიან დიდი გულისხმიერება და ამით ერთგვარად სოლიდარობა გამოუცხადა ჩვენს ქვეყანას, ჩვენს მედიკოსებს. ჩვენ დროებით შეჩერებული გვქონდა ლოცვები. მას შემდეგ რაც საგანგებო მდგომარეობა მოიხსნა და ეპიდემიოლოგიური სიტუაცია დადებითისკენ არის, ჩვენ შევძელით სრული წესების დაცვით, ნიღბებით, სადეზინფექციო ხსნარების გამოყენებით ბაირამის ლოცვის შესრულება,“ – თქვა ადამ შანთაძემ.