Batumelebi | როგორ გააგრძელებს კლინიკა „მედალფა“ ბათუმში მუშაობას როგორ გააგრძელებს კლინიკა „მედალფა“ ბათუმში მუშაობას – Batumelebi

როგორ გააგრძელებს კლინიკა „მედალფა“ ბათუმში მუშაობას

კლინიკა „მედალფაში“, რომელიც ბოლო ორი თვეა კოვიდკლინიკად იყო გადაკეთებული, 23 მაისის მდგომარეობით არცერთი ინფიცირებული პაციენტი აღარაა. ბოლო ორმა პაციენტმა კლინიკა დღეს დატოვა.

რა რეჟიმში გააგრძელებს მუშაობას კლინიკა და მიიღებს თუ არა არაკოვიდ პაციენტებს, ამის შესახებ „ბათუმელები“ „მედალფას“ აჭარა-გურიის რეგიონულ დირექტორს, ლევან ანთაძეს ესაუბრა.

  • ბატონო ლევან, რა რეჟიმში გააგრძელებს მუშაობას კლინიკა „მედალფა“?

ორი დღის წინ გვქონდა აჭარის ჯანდაცვის სამინისტროში შეხვედრა და ჩამოვყალიბდებით ერთობლივად როგორ ვაპირებთ, რას ვაპირებთ, რა რეჟიმით ვაპირებთ.

სავარაუდოდ ვიქნებით მოცდის რეჟიმში – თუკი კოვიდინფიცირებული პაციენტი გამოჩნდება აჭარაში და მიმდებარედ გურიაში, ასევე სამეგრელოს გარკვეულ ნაწილში, სხვა კლინიკა არ არსებობს, რომელიც მიიღებს ასეთ პაციენტებს. ალბათ მოცდის რეჟიმში გადავალთ რაღაც პერიოდი. მანამდე სხვა პაციენტებს ვერ მივიღებთ.

  • ექიმები, რომლებიც კოვიდინფიცირებულ პაციენტებთან მუშაობდნენ განცალკევებულად ცხოვრობდნენ სასტუმროში. ეს ექიმები სად იქნებიან?

ის მედპერსონალი, ვინც მოცდის რეჟიმში დაგვჭირდება, სასტუმროში დარჩება. დანარჩენი ჩვეულებრივ კარანტინის შემდეგ წავლენ სახლში. რაღაც პერიოდი დაისვენებენ, მერე ჩაენაცვლებიან სხვებს და ა.შ.

შტატები და ხელფასები შეუნარჩუნდება მედპერსონალს?

დიახ, ვინც მუშაობს, ყველას შეუნარჩუნდება სამსახურიც და ხელფასიც.

როგორც ვიცით, კლინიკის მედპერსონალიდან რამდენიმე დაინფიცირდა. როგორ არიან ახლა და თუ დაუბრუნდნენ მუშაობას?

ნაწილი დაუბრუნდა, ნაწილი კარანტინშია. თუმცა ყველა გამოჯანმრთელებულია და კარგადაა.

 

ნეტგაზეთის მასალების სხვა გამოცემებში გადაბეჭდვის წესი
ავტორი