ბათუმის შოთა რუსთაველის სახელმწიფო უნივერსიტეტი – ბსუ 8 ცალი თაღოვანი ტიპის სადეზინფექციო მოწყობილობის და 16 ლიტრი სადეზინფექციო ხსნარის [დენზოტეკის კონცენტრატის] შეძენას 29 280 ლარად, ტენდერის გარეშე გეგმავს. ამ ღირებულებაში შედის მოწყობილობის ტრანსპორტირება, მონტაჟი და ექსპლუატაციაში გაშვება.
„ბსუ-ში 2020 წლის ივნისის მესამე დეკადიდან იგეგმება სასწავლო პროცესების განახლება და სტუდენტთა ლაბორატორიული პრაქტიკები, რომლებზეც სტუდენტთა დასწრება განხორციელდება ფიზიკურად. შესაბამისად, კორონავირუსის გავრცელების პრევენციის მიზნით აუცილებელია სადეზინფექციო მოწყობილობების შესყიდვა განხორციელდეს გამარტივებული შესყიდვის საშუალებით, რისთვისაც საჭიროა სახელმწიფო შესყიდვების სააგენტოდან მიღებული იქნას შესაბამისი თანხმობა.“ – აღნიშნულია ბსუ-ს განაცხადში.
სასწავლებლის ინფორმაციით, „შესყიდვის დაგეგმვის მიზნით ჩატარდა ბაზრის კვლევა, რომელშიც მონაწილეობაზე შეტყობინებები დაეგზავნა 26 კომპანიას. ყველაზე დაბალი ფასი წარმოდგენილი იქნა შპს „აირონ ტექ20“-ის მიერ, რომლის მიხედვითაც სულ 8 ცალი სადიზენფექციო მოწყობილობის ღირებულებამ მისი ტრანსპორტირების, მონტაჟისა და ექსპლოატაციაში გაშვების ხარჯების გათვალისწინებით შეადგინა 29 280 ლარი, ხოლო მოწოდებისა და მონტაჟისათვის კომპანიის მიერ მოთხოვნილია ერთი თვის პერიოდი“.
—
ახალი კორონავირუსით გამოწვეულ ინფექციასთან (COVID-19) დაკავშირებული ზოგადი რეკომენდაციები უმაღლესი საგანმანათლებლო დაწესებულების ლაბორატორიებისა და შიდა საგამოცდო ცენტრებისთვის, საქართველოს ჯანდაცვის მინისტრის 15 მაისის ბრძანებით დამტკიცდა.
[red_box]ამ რეკომენდაციების მიხედვით, საგამოცდო ცენტრებს ევალებათ:[/red_box]
- გამოცდაზე სტუდენტების მიღება უზრუნველყავით იმგვარად, რომ დაკავებული იყოს სამუშაო ფართის 50%;
- მაგიდების განლაგებისას გამოიყენეთ პრინციპი: სამუშაო სივრცის ყოველ 5მ2 ფართობზე დაუშვით მხოლოდ 1 (ერთი) ადამიანი;
- არ დაუშვით საგამოცდო ცენტრში პედაგოგები და სტუდენტები ინდივიდუალური დაცვის საშუალებების გარეშე;
- სტუდენტები მაგიდებთან არ განათავსოთ ერთმანეთის პირისპირ;
- საგამოცდო ცენტრში სტუდენტების მისაღებად გამოიყენეთ ცვლებში მუშაობის რეჟიმი;
- ყოველი ცვლის შემდგომ გამოიყენეთ სანიტარული შესვენება;
- უზრუნველყავით საგამოცდო დარბაზის შესასვლელში ხელის დეზინფექციისთვის საჭირო სულ მცირე, 70% ალკოჰოლის შემცველი ხელის დასამუშავებელი ხსნარის განთავსება;
- უზრუნველყავით გამოყენებული ერთჯერადი ხელსახოცებისა თუ სხვა გამოყენებული ჰიგიენური ნარჩენებისთვის დახურული კონტეინერების განთავსება, რომელშიც ჩაფენილი იქნება ერთჯერადი პლასტიკური პაკეტი. ნარჩენების პარკის ამოღება და განკარგვა მოახდინეთ ერთჯერადი
ხელთათმანების გამოყენებით. უზრუნველყავით ასეთი ნარჩენების დროული გატანა შესაბამისი პირის/სამსახურის მიერ.
სამინისტრომ დაამტკიცა ძირითადი რეკომენდაციები უმაღლესი საგანმანათლებლო დაწესებულების ლაბორატორიებისთვის, ასევე, პედაგოგთა და სტუდენტთა ვალდებულებები.
