არასამთავრობო ორგანიზაცია „საერთაშორისო გამჭვირვალობა -საქართველოს“ შეფასებით, აჭარის უმაღლესი საბჭოს წევრებს ქონებრივი დეკლარაციები არასრულად და შეცდომით აქვთ შევსებული. საუბარია თანამდებობის 6 პირზე.
„2019-2020 წლებში წარდგენილ ქონებრივი დეკლარაციებში გამოვლენილი დარღვევებიდან 4 შემთხვევა ეხება თანამდებობის პირებისა და მათი ოჯახის წევრების კუთვნილი ქონების (უძრავი ქონება, წილები საწარმოებში) არასრულ დეკლარირებას. ამასთან, 2 შემთხვევაში სხვადასხვა საწარმოში წილების მფლობელ თანამდებობის პირებს წილები სხვა პირებისთვის მინდობით არ გადაუციათ, რაც ასევე არის საჯარო დაწესებულებაში ინტერესთა შეუთავსებლობისა და კორუფციის შესახებ კანონის მოთხოვნათა დარღვევა“, – წერს „საერთაშორისო გამჭვირვალობა“.
თორნიკე რიჟვაძე – აჭარის მთავრობის თავმჯდომარე
„საერთაშოროსო გამჭვირვალობა საქართველოს“ შეფასებით, თორნიკე რიჟვაძეს 2019 წლის 30 სექტემბერს შევსებულ ქონებრივ დეკლარაციაში მითითებული აქვს 25% წილი შპს „აჭარა ბერრის ლიმითედში”. რიჟვაძეს მოცემული წილის მართვა სხვა პირისთვის მინდობით უნდა გადაეცა, რაც მან არ გააკეთა. საჯარო რეესტრის მონაცემებით, 2017 წლის 31 ივლისს, თორნიკე რიჟვაძემ ეს წილი თორნიკე კუჭავას აჩუქა (კუჭავა აჭარის ფინანსთა და ეკონომიკის მინისტრის მოადგილე გახდა მას შემდეგ, რაც თორნიკე რიჟვაძე აჭარის მთავრობის თავმჯდომარედ დაამტკიცეს). თუმცა სათანადო დოკუმენტაციის არასრულად წარდგენის გამო საჯარო რეესტრმა რიჟვაძის განცხადება არ დაარეგისტრირა. შესაბამისად, კომპანიის 25% დღემდე თორნიკე რიჟვაძის საკუთრებაში რჩება.
ზურაბ თენიეშვილი – აჭარის ჯანმრთელობისა და სოციალური დაცვის მინისტრის მოადგილე
ზურაბ თენიეშვილმა, 2020 წლის 17 იანვარს შევსებულ ქონებრივ დეკლარაციაში არ მიუთითა შემოსავალი, რომელიც ბათუმში, თანასაკუთრებაში არსებულ 175 კვ.მ. კომერციულ ფართობში საკუთარი წილის გასხვისებიდან მიიღო. ფარნავაზ მეფის 92/94 ნომერში მდებარე კომერციული ფართობის ნახევარს თენიეშვილი 2019 წლის 9 იანვრამდე ფლობდა, შესაბამისად, ქონების ნასყიდობის ხელშეკრულებიდან მიღებული შემოსავალი 2020 წლის დასაწყისში შევსებულ დეკლარაციაში უნდა მიეთითებინა.
მუხრან კაკაბაძე – აჭარის საავტომობილო გზების დეპარტამენტის უფროსი
2019 წლის 10 სექტემბრის ქონებრივ დეკლარაციაში მუხრან კაკაბაძეს მითითებული არ აქვს მამის, ნოდარ კაკაბაძის სამეწარმეო საქმიანობა: ნოდარ კაკაბაძე შპს „სახლი პიაცასთან” დირექტორი და 20%-იანი წილის მფლობელია. ამასთან, კაკაბაძეს დეკლარირებული არ აქვს შემდეგი უძრავი ქონება: მის საკუთრებაში არსებული 57.22 კვ.მ. ბინა ბათუმში და დედის, ტატიანა ემინზადეს 38.28 კვ.მ. ფართობი ბათუმში.
ნუგზარ სურმანიძე – აჭარის უმაღლესი საბჭოს წევრი, ჯანმრთელობის დაცვისა და სოციალურ საკითხთა კომიტეტის თავმჯდომარე
2020 წლის 24 იანვარს შევსებულ ქონებრივ დეკლარაციაში ნუგზარ სურმანიძემ მიუთითა, რომ მეუღლეს, სვეტლანა სურმანიძეს, შპს „ვიტაფარმის” 10%-იანი წილის მართვიდან 2019 წელს შემოსავალი არ მიუღია. ამ კომპანიამ, 2019 წელს, სახელმწიფო და გამარტივებული შესყიდვებიდან ჯამში 56,920 ლარი მიიღო.
ხვიჩა შარაშიძე – აჭარის უმაღლესი საბჭოს წევრი
ხვიჩა შარაშიძის 2020 წლის ქონებრივი დეკლარაციის მიხედვით, აჭარის უმაღლესი საბჭოს წევრი შპს „ჩემი სახლის”, შპს „დუპლექსი-სამშენებლო კომპანიის” და შპს „vox”-ის 50%-იანი წილების მფლობელია. შარაშიძეს თანამდებობაზე დანიშვნიდან მალევე არსებული წილების მართვა სხვა პირისთვის მინდობით უნდა გადაეცა, რაც არ გააკეთა.
ვახტანგ წულაძე -აჭარის უმაღლესი საბჭოს წევრი, აგრარულ და გარემოს დაცვის საკითხთა კომიტეტის თავმჯდომარე
2019 წლის 28 თებერვალს შევსებულ ქონებრივ დეკლარაციაში ვახტანგ წულაძემ არ მიუთითა თავის საკუთრებაში არსებული 23.10 კვ.მ. ფართობი ბათუმში.
