„მეტრო ჰოლდინგის“ ერთ-ერთი დირექტორის, რაულ კახაძის ინფორმაციით, ბათუმში პირველი აფთიაქის შენობის მასშტაბების შეცვლას კომპანია არ გეგმავს, შენარჩუნდება შენობის ძველი იერსახე და მას მხოლოდ რეაბილიტაციას ჩაუტარებენ. ამის თაობაზე ნებართვის მიღების მოთხოვნით კომპანიამ კულტურული მემკვიდრეობის ძეგლების საბჭოს უკვე მიმართა:
„შეგიძლიათ ახაროთ ბათუმელებს, რომ ისტორიულ ნაწილს არ შევეხებით, არც სიმაღლეში და არც სხვა პარამეტრში, არაფერს შევცვლით“.
რაულ კახაძის ინფორმაციით, არ იცვლება ხელშეკრულებით ნაკისრი ვალდებულებებიც, შენობაში სასტუმრო მოეწყობა.
გარდა ამისა, შპს „ჟასმინს“, ყოფილ მფლობელს, ხელშეკრულებით ნაკისრი ვალდებულებების მიხედვით შენობაში სამორინეც უნდა მოეწყო. კომპანიაში აპირებს სამინისტროსთან ამ ვალდებულების შეცვლის საკითხი განიხილოს: „ ვფიქრობთ, სამორინეს ნაცვლად ბრენდული მაღაზია ხომ არ განვათავსოთ“.
რაც შეეხება დავალიანებას, რომელიც ყოფილ მფლობელ კომპანიას, შპს „ჟასმინს“ ხელშეკრულების პირობების დარღვევის გამო დარიცხული პირგასამტეხლოს სახით დაუგროვდა, კომპანიაში ზუსტად არ იციან, მოუწევს ამ თანხის გადახდა, თუ მიაღწევს შეთანხმებას აჭარის ფინანსთა და ეკონომიკის სამინისტროსთან პირგასამტეხლოს ჩამოწერის თაობაზე:
„ჯერ მოლაპარაკებები მიმდინარეობს, აქ ამ მხარეს უნდა შევხედოთ, ჟასმინმა იმიტომ ვერ შეასრულა ვალდებულებები, რომ ვერ მიიღო მშენებლობის ნებართვა“.
ბათუმში ყოფილი პირველი აფთიაქის შენობის ახალი მფლობელი „მეტრო ჰოლდინგის“ დამფუძნებელი გალიფ ოზთურქია. 2019 წლის დეკემბერში მან ამ ქონების მესაკუთრე კომპანიის შპს „ჟასმინის“ ასი პროცენტი შეისყიდა.
ვრცლად ამ თემაზე:
13 მლნ დოლარად გაიყიდა ბათუმში პირველი აფთიაქის შენობა – მყიდველი „მეტროს“ მფლობელია
