ეროვნული ბანკის მარტის თვის მიმოხილვის მიხედვით, 2020 წლის მარტში საერთაშორისო ვიზიტორების რაოდენობა წინა წლის ამავე პერიოდთან შედარებით 58.6 პროცენტით შემცირდა. ასევე შემცირდა ერთდღიანი ვიზიტების რაოდენობა.
2020 წლის მარტში რეგიონის ქვეყნებიდან საერთაშორისო ვიზიტორების კლებით გამოირჩეოდა რუსეთი (66.5 პროცენტი), აზერბაიჯანი (62.9 პროცენტი) და სომხეთი (61.1 პროცენტი).
„ახალი კორონავირუსის პანდემიის გავრცელების თავიდან აცილების მიზნით მსოფლიოს ბევრმა ქვეყანამ საგანგებო მდგომარეობა გამოაცხადა და როგორც სახმელეთო, ასევე საჰაერო საზღვრები ჩაკეტა. ამ სიტუაციამ, ბუნებრივია, იმოქმედა საქართველოში შემომსვლელ ვიზიტორთა რაოდენობაზე“, – აღნიშნულია ეროვნული ბანკის მიმოხილვაში.
ამავე მიმოხილვის მიხედვით, ევროკავშირის ქვეყნებიდან შემოსული ვიზიტორების დიდი კლება აღინიშნა გერმანიიდან (-45.7 პროცენტი), იტალიიდან (-77.7 პროცენტი) და ლატვიიდან (-42.8 პროცენტი) შემოსული ვიზიტორების მხრივ. ხოლო ესტონეთიდან მოიმატა ვიზიტორთა რაოდენობამ 23.3 პროცენტით. ზოგადად, ვიზიტორთა რაოდენობა თითქმის ყველა ქვეყნიდან შემცირებულია.
საქართველოს ეკონომიკის მინისტრის, ნათია თურნავას განცხადებით, მთავრობა ტურისტული ინდუსტრიის დასახმარებლად სპეციფიკურ გეგმას ამზადებს. ამის შესახებ მან ანტიკრიზისული გეგმის პრეზენტაციისას განაცხადა. მისი თქმით, გეგმა ამჟამად შემუშავების პროცესშია.
ამ თემაზე:
რა პროგრამები არ განხორციელდება ტურიზმის მიმართულებით აჭარაში – Covid-19
