Batumelebi | მივმართავ ფინანსთა მინისტრს – „ევროპული საქართველოს“ გამოხმაურება „ბათუმელების“ სტატიაზე მივმართავ ფინანსთა მინისტრს – „ევროპული საქართველოს“ გამოხმაურება „ბათუმელების“ სტატიაზე – Batumelebi
RU | GE  

მივმართავ ფინანსთა მინისტრს – „ევროპული საქართველოს“ გამოხმაურება „ბათუმელების“ სტატიაზე

დღეს, 28 აპრილს, „ბათუმელების“ მიერ მომზადებულ სტატიას – „ფელიქსის წილი“ – გადამზიდავებს თანამდებობის პირების სახელით ბიზნესს ართმევენ“, პარტია „ევროპული საქართველო“ გამოეხმაურა. ამ თემაზე განცხადება პარტიის ერთ-ერთმა ლიდერმა, გიორგი კანდელაკმა გააკეთა.

„ევროპული საქართველოს სახელით მსურს გამოვეხმაურო გაზეთ „ბათუმელების“ და „ნეტგაზეთის“ ძალიან შთამბეჭდავ ჟურნალისტურ გამოძიებას, რომელიც ეხება გადამზიდავების, კერძოდ, თურქეთიდან სომხეთში ტრანზიტული ტვირთების გადამზიდავების რეკეტს, ვინმე რუსეთის მოქალაქის, ფელიქს ხუდოევის მიერ, რომელიც, როგორც ამ გამოძიებიდან ჩანს და რაზეც საუბრობენ ღიად, ყოველგვარი ანონიმურობის გარეშე ქართველი და უცხოელი ბიზნესმენები, მოქმედებს საქართველოს მთავრობასთან უნისონში.

გადამზიდავები იძულებულნი არიან, შევიდნენ გარიგებაში ამ ბატონთან, ბატონ ხუდოევთან, სხვა შემთხვევაში მათ ტვირთებს აჩერებენ სარფში, რაც იწვევს მათ გაკოტრებას. ამაზე ღიად საუბრობენ დამსაქმებლები, ბიზნესმენები, რომლებიც ასაქმებენ ადამიანებს და თავისი შრომით იხდიან გადასახადებს.

როგორც ჩანს, პანდემიის დროს, როცა საზოგადოების ყურადღება არის ფოკუსირებული კორონავირუსზე, ვიღაცები სარგებლობენ ამ სიტუაციით და სურთ დააბრუნონ 90-იანი წლები და რეკეტი, სხვა სიტყვას მე ვერ ვიხმარ.

მინიმალური შემხებლობა ვისაც აქვს გადაზიდვებთან და ამ სფეროსთან, ყველამ კარგად იცის, რომ ასეთი რაღაცები არ ხდება ფინანსთა მინისტრის უშუალო ინფორმირების და მონაწილეობის, მის მიერ გაცემული ინსტრუქციების გარეშე. ამიტომ ჩვენ მივმართავთ ფინანსთა მინისტრს, გააკეთოს განმარტება ამ საქმესთან დაკავშირებით, რატომ ხდება კეთილსინდისიერი გადამზიდავების ტვირთების გაჩერება საბაჟოზე ასეთი ხანგძლივი დროით და რატომ არაფერი არ ხდება მოკვლევასთან/გამოძიებასთან დაკავშირებით, რომელიც დაახლოებით ერთი თვის წინ დაიწყო, იმიტომ რომ გადამზიდავებმა საჩივარი შეიტანეს შემოსავლების სამსახურში 26 მარტს.

პრაქტიკულად ერთი თვეა გასული და არაფერი არ ხდება გამოძიების კუთხით, სამაგიეროდ ხდება ის, რასაც ბატონი ფელიქსი, როგორც მას მოიხსენიებენ, დაჰპირდა გადამზიდავებს, ყველა იმ გადამზიდავის ტვირთი, ვინც არ არის მასთან შესული გარიგებაში, ჩერდება საბაჟოზე“ – განაცხადა გიორგი კანდელაკმა.

გაეცანით სტატიას: 

„ფელიქსის წილი“ – გადამზიდავებს თანამდებობის პირების სახელით ბიზნესს ართმევენ

 

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com